Verse 1: യേശുക്രിസ്‌തുവിന്‍െറ ദാസന്‍മാരായ പൗലോസും തിമോത്തേയോസും ഫിലിപ്പിയിലെ മെത്രാന്‍മാരും ഡീക്കന്‍മാരും ഉള്‍പ്പെടെ യേശുക്രിസ്‌തുവിലുള്ള സകല വിശുദ്‌ധര്‍ക്കും എഴുതുന്നത്‌.
Verse 2: നമ്മുടെ പിതാവായ ദൈവത്തില്‍നിന്നും കര്‍ത്താവായ യേശുക്രിസ്‌തുവില്‍നിന്നും നിങ്ങള്‍ക്കു കൃപയും സമാധാനവും.
Verse 3: ഞാന്‍ നിങ്ങളെ ഓര്‍മിക്കുമ്പോഴെല്ലാം എന്‍െറ ദൈവത്തിനു നന്‌ദിപറയുന്നു;
Verse 4: എപ്പോഴും എന്‍െറ എല്ലാ പ്രാര്‍ഥനകളിലും നിങ്ങള്‍ക്കെല്ലാവര്‍ക്കുംവേണ്ടി സന്തോഷത്തോടെയാചിക്കുന്നു;
Verse 5: ആദ്യദിവസംമുതല്‍ ഇന്നുവരെയും സുവിശേഷപ്രചാരണത്തിലുള്ള നിങ്ങളുടെ കൂട്ടായ്‌മയ്‌ക്കു ഞാന്‍ നന്‌ദി പറയുന്നു.
Verse 6: നിങ്ങളില്‍ സത്‌പ്രവൃത്തി ആരംഭിച്ചവന്‍ യേശുക്രിസ്‌തുവിന്‍െറ ദിനമാകുമ്പോഴേക്കും അതു പൂര്‍ത്തിയാക്കുമെന്ന്‌ എനിക്കു ബോധ്യമുണ്ട്‌.
Verse 7: നിങ്ങളെ എന്‍െറ ഹൃദയത്തില്‍ സംവഹിക്കുന്നതുകൊണ്ട്‌, നിങ്ങളെല്ലാവരെയുംകുറിച്ച്‌ ഞാന്‍ അപ്രകാരം വിചാരിക്കുന്നതുയുക്‌തമാണ്‌. കാരണം, നിങ്ങളെല്ലാവരും കൃപയില്‍ എന്‍െറ പങ്കുകാരാണ്‌; അതുപോലെ തന്നെ, എന്‍െറ ബന്‌ധനത്തിലും സുവിശേഷസംരക്‌ഷണത്തിലും സ്‌ഥിരീകരണത്തിലും.
Verse 8: യേശുക്രിസ്‌തുവിന്‍െറ വാത്‌സല്യത്തോടെ നിങ്ങളെല്ലാവരെയും കാണാന്‍ ഞാന്‍ എത്രമാത്രം ആഗ്രഹിക്കുന്നുവെന്നതിനു ദൈവംതന്നെ സാക്‌ഷി.
Verse 9: നിങ്ങളുടെ സ്‌നേഹം ജ്‌ഞാനത്തിലും എല്ലാത്തരത്തിലുമുള്ള വിവേചനാശക്‌തിയിലും ഉത്തരോത്തരം വര്‍ധിച്ചുവരട്ടെ എന്നു ഞാന്‍ പ്രാര്‍ഥിക്കുന്നു.
Verse 10: അങ്ങനെ, ഉത്തമമായവ തെരഞ്ഞെടുക്കാന്‍ നിങ്ങള്‍ക്കു കഴിയും.
Verse 11: ദൈവത്തിന്‍െറ മഹത്വത്തിനും സ്‌തുതിക്കുംവേണ്ടി യേശുക്രിസ്‌തുവിലൂടെ ലഭിക്കുന്ന നീതിയുടെ ഫലങ്ങള്‍കൊണ്ടു നിറഞ്ഞ്‌ നിങ്ങള്‍ ക്രിസ്‌തുവിന്‍െറ ദിനത്തിലേക്ക്‌ നിഷ്‌കളങ്കരും നിര്‍ദോഷരുമായി ഭവിക്കട്ടെ.
Verse 12: സഹോദരരേ, എനിക്കു സംഭവിച്ചതെല്ലാം സുവിശേഷത്തിന്‍െറ പുരോഗതിക്കു കാരണമായെന്ന്‌ നിങ്ങള്‍ അറിയാന്‍ ഞാന്‍ ആഗ്രഹിക്കുന്നു.
Verse 13: കാരണം, ഞാന്‍ ക്രിസ്‌തുവിനുവേണ്ടിയാണ്‌ ബന്‌ധനസ്‌ഥനായതെന്നു പ്രത്തോറിയം മുഴുവനിലുംശേഷം എല്ലാവര്‍ക്കും സുവിദിതമാണ്‌.
Verse 14: മിക്കസഹോദരര്‍ക്കും എന്‍െറ ബന്‌ധനംനിമിത്തം കര്‍ത്താവില്‍ ആത്‌മധൈര്യം ലഭിച്ചതുകൊണ്ട്‌ ഭയംകൂടാതെ ദൈവവചനം പ്രസംഗിക്കാന്‍ അവര്‍ കൂടുതല്‍ സന്നദ്‌ധരായിരിക്കുന്നു.
Verse 15: ചിലര്‍ അസൂയയും മാത്‌സര്യവും നിമിത്തം ക്രിസ്‌തുവിനെ പ്രസംഗിക്കുന്നു. മറ്റു ചിലര്‍ സന്‍മനസ്‌സോടെതന്നെ പ്രസംഗിക്കുന്നു.
Verse 16: ഇവര്‍ സ്‌നേഹത്തിന്‍െറ പേരിലാണ്‌ അങ്ങനെ ചെയ്യുന്നത്‌. കാരണം, സുവിശേഷത്തിന്‍െറ സംരക്‌ഷണത്തിനു ഞാന്‍ നിയുക്‌ത നാണെന്ന്‌ അവര്‍ക്കറിയാം.
Verse 17: ആദ്യത്തെ കൂട്ടര്‍ കക്‌ഷിമാത്‌സര്യംമൂലം, എന്‍െറ ബന്‌ധ നത്തില്‍ എനിക്കു ദുഃഖം വര്‍ധിപ്പിക്കാമെന്നു വിചാരിച്ചുകൊണ്ട്‌ ആത്‌മാര്‍ഥത കൂടാതെ ക്രിസ്‌തുവിനെ പ്രസംഗിക്കുന്നു.
Verse 18: എന്നാലെന്ത്‌? ആത്‌മാര്‍ഥതയോടെയാണെങ്കിലും കാപട്യത്തോടെയാണെങ്കിലും എല്ലാവിധത്തിലും ക്രിസ്‌തുവാണല്ലോ പ്രസംഗിക്കപ്പെടുന്നത്‌. ഇതില്‍ ഞാന്‍ സന്തോഷിക്കുന്നു; ഇനി സന്തോഷിക്കുകയും ചെയ്യും.
Verse 19: നിങ്ങളുടെ പ്രാര്‍ഥനയാലും യേശുക്രിസ്‌തുവിന്‍െറ ആത്‌മാവിന്‍െറ ദാനത്താലും ഇത്‌ എനിക്കു മോചനത്തിനായി പരിണമിക്കുമെന്നു ഞാന്‍ അറിയുന്നു.
Verse 20: ആകയാല്‍, എനിക്ക്‌ ഒന്നിലും ലജ്‌ജിക്കേണ്ടിവരുകയില്ലെന്നും, മറിച്ച്‌, പൂര്‍ണധൈര്യത്തോടെ എപ്പോഴും എന്നപോലെ ഇപ്പോഴും ക്രിസ്‌തു എന്‍െറ ശരീരത്തില്‍ - ജീവിതംവഴിയോ മരണംവഴിയോ - മഹത്വപ്പെടണമെന്നും എനിക്കു തീവ്രമായ ആഗ്രഹ വും പ്രതീക്‌ഷയുമുണ്ട്‌.
Verse 21: എനിക്കു ജീവിതം ക്രിസ്‌തുവും മരണം നേട്ടവുമാണ്‌.
Verse 22: ശാരീരികമായി ഇനിയും ഞാന്‍ ജീവിക്കുകയാണെങ്കില്‍, ഫലപ്രദമായി ജോലിചെയ്യാന്‍ സാധിക്കും. എങ്കിലും, ഏതാണു തെരഞ്ഞെടുക്കേണ്ടതെന്ന്‌ എനിക്ക്‌ അറിഞ്ഞുകൂടാ.
Verse 23: ഇവ രണ്ടിനുമിടയില്‍ ഞാന്‍ ഞെരുങ്ങുന്നു. എങ്കിലും, എന്‍െറ ആഗ്രഹം, മരിച്ച്‌ ക്രിസ്‌തുവിനോടുകൂടെ ആയിരിക്കാനാണ്‌. കാരണം, അതാണു കൂടുതല്‍ ശ്രഷ്‌ഠം.
Verse 24: പക്‌ഷേ, ഞാന്‍ ശരീരത്തില്‍ തുടരുക നിങ്ങളെ സംബന്‌ധിച്ചിടത്തോളം കൂടുതല്‍ ആവ ശ്യമാണ്‌.
Verse 25: നിങ്ങളുടെ അഭിവൃദ്‌ധിക്കും വിശ്വാസത്തിലുള്ള സന്തോഷത്തിനുമായി ഞാന്‍ തുടര്‍ന്നു ജീവിക്കുമെന്നും നിങ്ങളെല്ലാവരുടെയുംകൂടെ ആയിരിക്കുമെന്നും എനിക്കറിയാം.
Verse 26: നിങ്ങളുടെ അടുത്തേക്കുള്ള എന്‍െറ തിരിച്ചുവരവ്‌ യേശുക്രിസ്‌തുവില്‍ ഞാന്‍ മൂലമുള്ള നിങ്ങളുടെ അഭിമാനത്തെ വര്‍ധിപ്പിക്കും.
Verse 27: ഞാന്‍ നിങ്ങളെ വന്നുകണ്ടാലും നിങ്ങളില്‍നിന്നു ദൂരസ്‌ഥനായിരുന്നാലും, നിങ്ങള്‍ ഒരേ ആത്‌മാവോടും ഒരേ മനസ്‌സോടുംകൂടെ ഉറച്ചുനിന്നു സുവിശേഷത്തിലുള്ള വിശ്വാസത്തിനുവേണ്ടി പോരാടുന്നുവെന്ന്‌ നിങ്ങളെക്കുറിച്ചു കേള്‍ക്കുവാന്‍ തക്കവിധം, ക്രിസ്‌തുവിന്‍െറ സുവിശേഷത്തിനു യോഗ്യമായരീതിയില്‍ നിങ്ങള്‍ ജീവിക്കണമെന്നുമാത്രം.
Verse 28: നിങ്ങളുടെ എതിരാളികളില്‍നിന്നുണ്ടാകുന്നയാതൊന്നിനെയും ഭയപ്പെടേണ്ടാ. ദൈവത്തില്‍നിന്നുള്ള അടയാളമാണത്‌ - അവര്‍ക്കു നാശത്തിന്‍െറയും നിങ്ങള്‍ക്കു രക്‌ഷയുടെയും.
Verse 29: ക്രിസ്‌തുവില്‍ വിശ്വസിക്കാന്‍മാത്രമല്ല, അവനുവേണ്ടി സഹിക്കാന്‍കൂടിയുള്ള അനുഗ്രഹം അവനെപ്രതി നിങ്ങള്‍ക്കു ലഭിച്ചിരിക്കുന്നു.
Verse 30: ഒരിക്കല്‍ ഞാന്‍ ചെയ്‌തതായി കണ്ടതും ഇപ്പോള്‍ ഞാന്‍ ചെയ്യുന്നതായി നിങ്ങള്‍ കേള്‍ക്കുന്നതുമായ അതേ പോരാട്ടത്തില്‍ത്തന്നെയാണല്ലോ നിങ്ങളും ഏര്‍പ്പെട്ടിരിക്കുന്നത്‌.