Verse 1: തെക്കോവയിലെ ആട്ടിടയന്‍മാരിലൊരുവനായ ആമോസിന്‍െറ വാക്കുകള്‍. യൂദാരാജാവായ ഉസിയായുടെയും ഇസ്രായേല്‍ രാജാവും യോവാഷിന്‍െറ പുത്രനുമായ ജറോബോവാമിന്‍െറയും കാലത്ത്‌, ഭൂകമ്പത്തിനു രണ്ടു വര്‍ഷംമുന്‍പ്‌, ഇസ്രായേലിനെക്കുറിച്ച്‌ അവനുണ്ടായ അരുളപ്പാട്‌.
Verse 2: അവന്‍ പറഞ്ഞു: സീയോനില്‍നിന്നു കര്‍ത്താവ്‌ ഗര്‍ജിക്കുന്നു. ജറുസലെമില്‍നിന്ന്‌ അവിടുന്ന്‌ അരുളിച്ചെയ്യുന്നു; ഇടയന്‍മാരുടെ മേച്ചില്‍സ്‌ഥലങ്ങള്‍ വിലപിക്കുന്നു. കാര്‍മല്‍ മലയുടെ മുകള്‍പ്പരപ്പ്‌ കരിയുന്നു.
Verse 3: കര്‍ത്താവ്‌ അരുളിച്ചെയ്യുന്നു: ദമാസ്‌ക്കസ്‌ ആവര്‍ത്തിച്ചുചെയ്‌ത അതിക്രമങ്ങള്‍ക്കുള്ള ശിക്‌ഷ ഞാന്‍ പിന്‍വലിക്കുകയില്ല. കാരണം, അവര്‍ ഗിലയാദിനെ ഇരുമ്പു മെതിവണ്ടി കൊണ്ടു മെതിച്ചു.
Verse 4: ആകയാല്‍ ഞാന്‍ ഹസായേലിന്‍െറ ഭവനത്തിന്‍മേല്‍ അഗ്‌നി അയയ്‌ക്കും. ബന്‍ഹദാദിന്‍െറ ശക്‌തിദുര്‍ഗങ്ങളെ അതു വിഴുങ്ങിക്കളയും.
Verse 5: ദമാസ്‌ക്കസിന്‍െറ ഓടാമ്പല്‍ ഞാന്‍ ഒടിക്കും. ആവെന്‍ താഴ്‌വരയില്‍നിന്ന്‌ അതിലെ നിവാസികളെ ഞാന്‍ വിച്‌ഛേദിക്കും; ബഥേദനില്‍ നിന്നു ചെങ്കോലേന്തുന്നവനെയും. സിറിയാക്കാര്‍ കീറിലേക്കു പ്രവാസികളായി പോകും - കര്‍ത്താവ്‌ അരുളിച്ചെയ്യുന്നു.
Verse 6: കര്‍ത്താവ്‌ അരുളിച്ചെയ്യുന്നു: ഗാസാ ആവര്‍ത്തിച്ചു ചെയ്‌ത അതിക്രമങ്ങള്‍ക്കുള്ള ശിക്‌ഷ ഞാന്‍ പിന്‍വലിക്കുകയില്ല. കാരണം, ഏദോമിനു വിട്ടുകൊടുക്കാന്‍ വേണ്ടി ഒരു ജനത്തെ മുഴുവന്‍ അവര്‍ തടവുകാരായി കൊണ്ടുപോയി.
Verse 7: ഗാസായുടെ മതിലിന്‍മേല്‍ ഞാന്‍ അഗ്‌നി അയയ്‌ക്കും. അവളുടെ ശക്‌തിദുര്‍ഗങ്ങളെ അതു വിഴുങ്ങിക്കളയും.
Verse 8: അഷ്‌ദോദില്‍നിന്ന്‌ അതിലെ നിവാസികളെ ഞാന്‍ വിച്‌ഛേദിക്കും; അഷ്‌കലോണില്‍നിന്ന്‌ ചെങ്കോലേന്തുന്നവനെയും. എക്രാണിനെതിരേ ഞാന്‍ കൈ ഉയര്‍ത്തും. ഫിലിസ്‌ത്യരില്‍ അവശേഷിക്കുന്നവര്‍ നശിക്കും. ദൈവമായ കര്‍ത്താവാണ്‌ അരുളിച്ചെയ്യുന്നത്‌.
Verse 9: കര്‍ത്താവ്‌ അരുളിച്ചെയ്യുന്നു: ടയിര്‍ ആവര്‍ത്തിച്ച്‌ ചെയ്‌ത അതിക്രമങ്ങള്‍ക്കുള്ള ശിക്‌ഷ ഞാന്‍ പിന്‍വലിക്കുകയില്ല. കാരണം, അവര്‍ ഒരു ജനത്തെ മുഴുവന്‍ ഏദോമിന്‌ ഏല്‍പിച്ചുകൊടുത്തു. സാഹോദര്യത്തിന്‍െറ ഉടമ്പടി അവര്‍ വിസ്‌മരിച്ചു.
Verse 10: ആകയാല്‍, ഞാന്‍ ടയിറിന്‍െറ മതിലിന്‍മേല്‍ അഗ്‌നി അയയ്‌ക്കും. അവളുടെ ശക്‌തിദുര്‍ഗങ്ങളെ അതു വിഴുങ്ങിക്കളയും.
Verse 11: കര്‍ത്താവ്‌ അരുളിച്ചെയ്യുന്നു: ഏദോം ആവര്‍ത്തിച്ചു ചെയ്‌ത അതിക്രമങ്ങള്‍ക്കുള്ള ശിക്‌ഷ ഞാന്‍ പിന്‍വലിക്കുകയില്ല. കാരണം, അവന്‍ സ്വസഹോദരനെ വാളുമേന്തി അനുധാവനം ചെയ്‌തു; തെല്ലും കരുണ കാണിച്ചില്ല. അവന്‍െറ കോപം കെടാതെ ജ്വലിച്ചുനിന്നു. ക്രോധം ആളിക്കത്തിക്കൊണ്ടിരുന്നു.
Verse 12: തേമാനുമേല്‍ ഞാന്‍ അഗ്‌നി അയയ്‌ക്കും; ബൊസ്രായുടെ ശക്‌തി ദുര്‍ഗങ്ങളെ അതു വിഴുങ്ങിക്കളയും.
Verse 13: കര്‍ത്താവ്‌ അരുളിച്ചെയ്യുന്നു: അമ്മോന്യര്‍ ആവര്‍ത്തിച്ചു ചെയ്‌ത അതിക്രമങ്ങള്‍ക്കുള്ള ശിക്‌ഷ ഞാന്‍ പിന്‍വലിക്കുകയില്ല. കാരണം, അവര്‍ അതിര്‍ത്തി വിസ്‌തൃതമാക്കാന്‍ ഗിലയാദില്‍ വന്ന്‌ ഗര്‍ഭിണികളുടെ ഉദരം പിളര്‍ന്നു.
Verse 14: ആകയാല്‍, ഞാന്‍ റബ്ബായുടെ മതിലിന്‍മേല്‍ അഗ്‌നി അയയ്‌ക്കും; അവളുടെ ശക്‌തിദുര്‍ഗങ്ങളെ അതു വിഴുങ്ങിക്കളയും.യുദ്‌ധദിനത്തില്‍ അട്ടഹാസവും ചുഴലിക്കാറ്റിന്‍െറ ദിനത്തില്‍ കൊടുങ്കാറ്റും അതിന്‌ അകമ്പടി സേവിക്കും.
Verse 15: അവരുടെ രാജാവ്‌ നാടുകടത്തപ്പെടും; അവനും പ്രഭുക്കന്‍മാരും ഒരുമിച്ചുതന്നെ - കര്‍ത്താവാണ്‌ അരുളിച്ചെയ്യുന്നത്‌.