Verse 1: ദൈവമായ കര്‍ത്താവ്‌ എനിക്ക്‌ ഒരു ദര്‍ശനം നല്‍കി. രാജവിഹിതമായ പുല്ല്‌ അരിഞ്ഞതിനുശേഷം അതു വീണ്ടും മുളച്ചുതുടങ്ങിയപ്പോള്‍, അവിടുന്ന്‌ ഇതാ വെട്ടുകിളിപ്പറ്റത്തെ സൃഷ്‌ടിക്കുന്നു.
Verse 2: അവനാട്ടിലുള്ള പുല്ലെല്ലാം തിന്നൊടുക്കിയപ്പോള്‍, ഞാന്‍ പറഞ്ഞു: ദൈവമായ കര്‍ത്താവേ, മാപ്പു നല്‍കുക, ഞാന്‍ യാചിക്കുന്നു. യാക്കോബിന്‌ എങ്ങനെ നിലനില്‍ക്കാനാവും? അവന്‍ തീരെ ചെറിയവനല്ലേ?
Verse 3: കര്‍ത്താവ്‌ അതിനെക്കുറിച്ച്‌ അനുതപിച്ചു. ഒരിക്കലും അതു സംഭവിക്കുകയില്ലെന്ന്‌ അവിടുന്ന്‌ അരുളിച്ചെയ്‌തു.
Verse 4: ദൈവമായ കര്‍ത്താവ്‌ എനിക്ക്‌ ഒരു ദര്‍ശനം നല്‍കി. ഇതാ, അവിടുന്ന്‌ അഗ്‌നി അയച്ചു ശിക്‌ഷിക്കാന്‍ ഒരുങ്ങുന്നു. അഗ്‌നി അഗാധങ്ങളെ വിഴുങ്ങിയിട്ട്‌ ഭൂമിയെ ദഹിപ്പിക്കാന്‍ തുടങ്ങി.
Verse 5: അപ്പോള്‍, ഞാന്‍ പറഞ്ഞു: ദൈവമായ കര്‍ത്താവേ, മതിയാക്കുക. ഞാന്‍ യാചിക്കുന്നു. യാക്കോബ്‌ എങ്ങനെ നിലനില്‍ക്കും? അവന്‍ തീരെ ചെറിയവനല്ലേ?
Verse 6: കര്‍ത്താവ്‌ അതിനെക്കുറിച്ച്‌ അനുതപിച്ചു; ഒരിക്കലും അതു സംഭവിക്കുകയില്ല, ദൈവമായ കര്‍ത്താവ്‌ അരുളിച്ചെയ്‌തു.
Verse 7: അവിടുന്ന്‌ എനിക്കു മറ്റൊരു ദര്‍ശനം നല്‍കി. ഇതാ, തൂക്കുകട്ടയുടെ സഹായത്തോടെ പണിതുയര്‍ത്തിയ ഒരു മതിലിനോടു ചേര്‍ന്ന്‌ കര്‍ത്താവ്‌ കൈയില്‍ ഒരു തൂക്കുകട്ടയുമായി നില്‍ക്കുന്നു.
Verse 8: അവിടുന്ന്‌ ചോദിച്ചു: ആമോസ്‌, നീ എന്തു കാണുന്നു? ഒരു തൂക്കുകട്ട എന്നു ഞാന്‍ പറഞ്ഞു. കര്‍ത്താവ്‌ തുടര്‍ന്നു: കണ്ടാലും, എന്‍െറ ജനമായ ഇസ്രായേലിനുമധ്യേ ഞാനൊരു തൂക്കുകട്ട പിടിക്കും. ഇനിമേല്‍ ഞാന്‍ അവരെ വെറുതെ വിടുകയില്ല.
Verse 9: ഞാന്‍ ഇസഹാക്കിന്‍െറ പൂജാഗിരികള്‍ നിര്‍ജനവും ഇസ്രായേലിലെ ആരാധനാകേന്‌ദ്രങ്ങള്‍ ശൂന്യവുമാക്കും. ജറോബോവാമിന്‍െറ ഭവനത്തിനെതിരേ ഞാന്‍ വാളുമായിവരും.
Verse 10: അപ്പോള്‍ ബഥേലിലെ പുരോഹിത നായ അമാസിയാ ഇസ്രായേല്‍രാജാവായ ജറോബോവാമിന്‍െറ അടുത്ത്‌ ആളയച്ചുപറഞ്ഞു: ആമോസ്‌ നിനക്കെതിരേ ഇസ്രായേല്‍ ഭവനത്തിന്‍െറ മധ്യേ ഗൂഢാലോചന നടത്തിയിരിക്കുന്നു. അവന്‍െറ വാക്കുകള്‍ പൊറുക്കാന്‍ നാടിനു കഴിയുന്നില്ല.
Verse 11: കാരണം, ജറോബോവാം വാളിനിരയാകും, ഇസ്രായേല്‍ സ്വന്തം നാട്ടില്‍നിന്ന്‌ പ്രവാസത്തിലേക്കു പോകും എന്ന്‌ ആമോസ്‌ പറയുന്നു.
Verse 12: അമാസിയാ ആമോസിനോടു പറഞ്ഞു: ദീര്‍ഘദര്‍ശീ, യൂദാനാട്ടിലേക്ക്‌ ഓടുക. അവിടെ പ്രവചിച്ച്‌, അഹര്‍വൃത്തി കഴിച്ചുകൊള്ളുക.
Verse 13: ഇനിമേല്‍ ബഥേലില്‍ പ്രവചിക്കരുത്‌. ഇതു രാജാവിന്‍െറ ശ്രീകോവിലും രാജ്യത്തിന്‍െറ ക്‌ഷേത്രവുമാണ്‌.
Verse 14: ആമോസ്‌ മറുപടി പറഞ്ഞു: ഞാനൊരു പ്രവാചകനല്ല, പ്രവാചകപുത്രനുമല്ല. ഞാന്‍ ആട്ടിടയനാണ്‌. സിക്കമൂര്‍മരം വെട്ടിയൊരുക്കുകയായിരുന്നു എന്‍െറ ജോലി.
Verse 15: ആടുമേയിച്ചു നടന്ന എന്നെ വിളിച്ച്‌ കര്‍ത്താവ്‌ അരുളിച്ചെയ്‌തു: എന്‍െറ ജനമായ ഇസ്രായേലില്‍ചെന്ന്‌ പ്രവചിക്കുക.
Verse 16: അതിനാല്‍, ഇപ്പോള്‍ കര്‍ത്താവിന്‍െറ വാക്കു കേള്‍ക്കുക. ഇസ്രായേലിനെതിരേ പ്രവചിക്കരുതെന്നും ഇസഹാക്കിന്‍െറ ഭവനത്തിനെതിരേ പ്രസംഗിക്കരുതെന്നും നീ പറയുന്നു.
Verse 17: അതിനാല്‍, കര്‍ത്താവ്‌ അരുളിച്ചെയ്യുന്നു: നിന്‍െറ ഭാര്യ നഗരത്തില്‍ വേശ്യയായിത്തീരും. നിന്‍െറ പുത്രന്‍മാരും പുത്രികളും വാളിനിരയാകും, നിന്‍െറ ഭൂമി അളന്നു പങ്കിടും. അശുദ്‌ധദേശത്തു കിടന്നു നീ മരിക്കും. ഇസ്രായേല്‍ തീര്‍ച്ചയായും സ്വദേശം വിട്ട്‌ പ്രവാസത്തിലേക്കു പോകും.