Verse 1: സഹോദരരേ, നിയമത്തിന്‌ ഒരുവന്‍െറ മേല്‍ അധികാരമുള്ളത്‌ അവന്‍ ജീവിച്ചിരിക്കുന്ന കാലത്തുമാത്രമാണെന്ന്‌ അറിഞ്ഞുകൂടേ? നിയമം അറിയാവുന്നവരോടാണല്ലോ ഞാന്‍ സംസാരിക്കുന്നത്‌.
Verse 2: വിവാഹിതയായ സ്‌ത്രീ, ഭര്‍ത്താവു ജീവിച്ചിരിക്കുന്നിടത്തോളംകാലം, അവനോടു നിയമത്താല്‍ ബന്‌ധിക്കപ്പെട്ടിരിക്കുന്നു. ഭര്‍ത്താവു മരിച്ചാല്‍ ഭര്‍ത്താവുമായി തന്നെ ബന്‌ധിക്കുന്ന നിയമത്തില്‍നിന്ന്‌ അവള്‍ സ്വതന്ത്രയാകുന്നു.
Verse 3: ഭര്‍ത്താവു ജീവിച്ചിരിക്കേ അന്യപുരുഷനോടു ചേര്‍ന്നാല്‍ അവള്‍ വ്യഭിചാരിണിയെന്നു വിളിക്കപ്പെടും. ഭര്‍ത്താവു മരിച്ചാല്‍ അവനുമായി തന്നെ ബന്‌ധിക്കുന്ന നിയമത്തില്‍നിന്ന്‌ അവള്‍ സ്വതന്ത്രയാകും. പിന്നീടു മറ്റൊരു പുരുഷനെ വിവാഹം ചെയ്‌താല്‍ അവള്‍ വ്യഭിചാരിണിയാകുന്നില്ല.
Verse 4: അതുപോലെ എന്‍െറ സഹോദരരേ, ക്രിസ്‌തുവിന്‍െറ ശരീരംമുഖേന നിയമത്തിനു നിങ്ങള്‍ മരിച്ചവരായി. ഇത്‌ നിങ്ങള്‍ മരിച്ചവരില്‍നിന്നുയിര്‍പ്പിക്കപ്പെട്ടവന്‍െറ സ്വന്തമാകേണ്ടതിനും അങ്ങനെ നാം ദൈവത്തിനുവേണ്ടി ഫലം പുറപ്പെടുവിക്കേണ്ടതിനുമത്ര.
Verse 5: നാം ശാരീരികാഭിലാഷങ്ങള്‍ക്കനുസരിച്ചു ജീവിച്ചിരുന്നപ്പോള്‍ മരണത്തിനുവേണ്ടി ഫലങ്ങള്‍ പുറപ്പെടുവിക്കാന്‍ നിയമംവഴി പാപകരമായ ദുരാശകള്‍ നമ്മുടെ അവയവങ്ങളില്‍ പ്രവര്‍ത്തിച്ചിരുന്നു.
Verse 6: ഇപ്പോഴാകട്ടെ, നാം നമ്മെഅടിമപ്പെടുത്തിയിരുന്നതിനു മരിച്ച്‌ നിയമത്തില്‍നിന്നു മോചിതരായി. ഇത്‌ ആത്‌മാവിന്‍െറ പുതുമയില്‍, നിയമത്തിന്‍െറ പഴമയിലല്ല, നാം ശുശ്രൂഷ ചെയ്യുന്നതിനുവേണ്ടിയാണ്‌.
Verse 7: ആകയാല്‍ നാം എന്താണു പറയേണ്ടത്‌? നിയമം പാപമാണെന്നോ? ഒരിക്കലുമല്ല. എങ്കിലും, നിയമമില്ലായിരുന്നെങ്കില്‍ ഞാന്‍ പാപമെന്തെന്ന്‌ അറിയുമായിരുന്നില്ല. മോഹിക്കരുത്‌ എന്നു നിയമം അനുശാസിക്കാതിരുന്നെങ്കില്‍, മോഹം എന്തെന്നു ഞാന്‍ അറിയുമായിരുന്നില്ല.
Verse 8: എന്നാല്‍, പ്രമാണംവഴി അവസരം കണ്ടെത്തി പാപം എല്ലാവിധ മോഹവും എന്നില്‍ ജനിപ്പിച്ചു. നിയമത്തിന്‍െറ അഭാവത്തില്‍ പാപം നിര്‍ജീവമാണ്‌.
Verse 9: ഒരു കാലത്ത്‌ നിയമം കൂടാതെ ഞാന്‍ ജീവിച്ചു. എന്നാല്‍, പ്രമാണം വന്നപ്പോള്‍ പാപം സജീവമാവുകയും ഞാന്‍ മരിക്കുകയും ചെയ്‌തു.
Verse 10: ഇങ്ങനെ ജീവനുവേണ്ടിയുള്ള പ്രമാണം എനിക്കു മരണമായിത്തീര്‍ന്നു.
Verse 11: എന്തുകൊണ്ടെന്നാല്‍, പാപം കല്‍പനവഴി അവസരം കണ്ടെത്തി എന്നെ ചതിക്കുകയും അതുവഴി എന്നെ കൊല്ലുകയും ചെയ്‌തു.
Verse 12: നിയമം വിശുദ്‌ധംതന്നെ; കല്‍പന വിശുദ്‌ധവുംന്യായ വും നല്ലതുമാണ്‌.
Verse 13: അപ്പോള്‍, നന്‍മയായിട്ടുള്ളത്‌ എനിക്കു മരണമായിത്തീര്‍ന്നെന്നോ? ഒരിക്കലുമില്ല, പാപമാണു നന്‍മയായിട്ടുള്ളതിലൂടെ എന്നില്‍ മരണമുളവാക്കിയത്‌. ഇത്‌, പാപം പാപമായിട്ടുതന്നെ കാണപ്പെടുന്നതിനും കല്‍പനവഴി പൂര്‍വാധികം പാപകരമായിത്തീരുന്നതിനും വേണ്ടിയാണ്‌.
Verse 14: നിയമം ആത്‌മീയമാണെന്നു നാമറിയുന്നു. ഞാന്‍ പാപത്തിന്‌ അടിമയായി വില്‍ക്കപ്പെട്ട ജഡികനാണ്‌.
Verse 15: ഞാന്‍ ചെയ്യുന്ന പ്രവൃത്തികള്‍തന്നെ എനിക്കു മനസ്‌സിലാകുന്നില്ല. എന്തെന്നാല്‍, ഞാന്‍ ഇച്‌ഛിക്കുന്നതല്ല, വെറുക്കുന്നതാണു ഞാന്‍ പ്രവര്‍ത്തിക്കുന്നത്‌.
Verse 16: ഞാന്‍ ഇ ച്‌ഛിക്കാത്തതു പ്രവര്‍ത്തിക്കുന്നെങ്കില്‍ നിയമം നല്ലതാണെന്നു ഞാന്‍ സമ്മതിക്കുന്നു.
Verse 17: എന്നാല്‍, ഇപ്പോള്‍ അങ്ങനെ പ്രവര്‍ത്തിക്കുന്നതു ഞാനല്ല, എന്നില്‍ കുടികൊള്ളുന്ന പാപമാണ്‌.
Verse 18: എന്നില്‍, അതായത്‌, എന്‍െറ ശരീരത്തില്‍, നന്‍മ വസിക്കുന്നില്ലെന്നു ഞാനറിയുന്നു. നന്‍മ ഇച്‌ഛിക്കാന്‍ എനിക്കു സാധിക്കും; എന്നാല്‍, പ്രവര്‍ത്തിക്കാന്‍ സാധിക്കുന്നില്ല.
Verse 19: ഇച്‌ഛിക്കുന്ന നന്‍മയല്ല, ഇ ച്‌ഛിക്കാത്ത തിന്‍മയാണു ഞാന്‍ പ്രവര്‍ത്തിക്കുന്നത്‌.
Verse 20: ഞാന്‍ ഇച്‌ഛിക്കാത്തതു ഞാന്‍ ചെയ്യുന്നുവെങ്കില്‍, അതു ചെയ്യുന്നത്‌ ഒരിക്കലും ഞാനല്ല, എന്നില്‍ വസിക്കുന്ന പാപമാണ്‌.
Verse 21: അങ്ങനെ, നന്‍മ ചെയ്യാനാഗ്ര ഹിക്കുന്ന എന്നില്‍ത്തന്നെതിന്‍മയുണ്ട്‌ എന്നൊരു തത്വം ഞാന്‍ കാണുന്നു.
Verse 22: എന്‍െറ അന്തരംഗത്തില്‍ ഞാന്‍ ദൈവത്തിന്‍െറ നിയമമോര്‍ത്ത്‌ ആഹ്ലാദിക്കുന്നു.
Verse 23: എന്‍െറ അവയവങ്ങളിലാകട്ടെ, എന്‍െറ മനസ്‌സിന്‍െറ നിയമത്തോടു പോരാടുന്ന വേറൊരു നിയമം ഞാന്‍ കാണുന്നു. അത്‌ എന്‍െറ അവയവങ്ങളിലുള്ള പാപത്തിന്‍െറ നിയമത്തിന്‌ എന്നെ അടിമപ്പെടുത്തുന്നു.
Verse 24: ഞാന്‍ ദുര്‍ഭഗനായ മനുഷ്യന്‍! മരണത്തിന്‌ അധീനമായ ഈ ശരീരത്തില്‍നിന്ന്‌ എന്നെ ആരു മോചിപ്പിക്കും?
Verse 25: നമ്മുടെ കര്‍ത്താവായ യേശുക്രിസ്‌തുവഴി ദൈവത്തിനു സ്‌തോത്രം! ചുരുക്കത്തില്‍, ഞാന്‍ എന്‍െറ മനസ്‌സുകൊണ്ടു ദൈവത്തിന്‍െറ നിയമത്തെ സേവിക്കുന്നു; എന്‍െറ ശരീരംകൊണ്ടു പാപത്തിന്‍െറ നിയമത്തെയും.