Verse 1: സഹോദരരേ, സമയങ്ങളെയും കാലങ്ങളെയും സംബന്‌ധിച്ചു നിങ്ങള്‍ക്കു ഞാന്‍ എഴുതേണ്ടതില്ല.
Verse 2: കാരണം, രാത്രിയില്‍ കള്ളന്‍ എന്നപോലെ കര്‍ത്താവിന്‍െറ ദിനം വരുമെന്നു നിങ്ങള്‍ക്കു നന്നായറിയാം.
Verse 3: സമാധാനവും ഭദ്രതയും എന്ന്‌ അവര്‍ പറഞ്ഞുകൊണ്ടിരിക്കെത്തന്നെ, ഗര്‍ഭിണിക്കു പ്രസവവേദനയുണ്ടാകുന്നതുപോലെ പെട്ടെന്നു നാശം അവരുടെമേല്‍ നിപതിക്കും; അതില്‍നിന്ന്‌ അവര്‍ രക്‌ഷപെടുകയില്ല.
Verse 4: എന്നാല്‍, സഹോദരരേ, ആദിവസം കള്ളന്‍ എന്നപോലെ നിങ്ങളെ അപ്രതീക്‌ഷിതമായി പിടികൂടാന്‍ ഇടയാകത്തക്കവിധം നിങ്ങള്‍ അന്‌ധ കാരത്തിലല്ല കഴിയുന്നത്‌.
Verse 5: നിങ്ങളെല്ലാവരും പ്രകാശത്തിന്‍െറയും പകലിന്‍െറയും പുത്രന്‍മാരാണ്‌. നമ്മില്‍ ആരുംതന്നെ രാത്രിയുടെയോ അന്‌ധകാരത്തിന്‍െറ യോ മക്കളല്ല.
Verse 6: അതിനാല്‍, മറ്റുള്ളവരെപ്പോലെ ഉറങ്ങിക്കഴിയാതെ നമുക്ക്‌ ഉണര്‍ന്നു സുബോധമുള്ളവരായിരിക്കാം.
Verse 7: ഉറങ്ങുന്നവര്‍ രാത്രിയിലാണ്‌ ഉറങ്ങുന്നത്‌. മദ്യപിച്ച്‌ ഉന്‍മത്തരാകുന്നവര്‍ രാത്രിയിലാണ്‌ ഉന്‍മത്തരാകുന്നത്‌.
Verse 8: പകലിന്‍െറ മക്കളായ നമുക്കു വിശ്വാസത്തിന്‍െറയും സ്‌നേഹത്തിന്‍െറയും കവചവും രക്‌ഷയുടെ പ്രത്യാശയാകുന്ന പടത്തൊപ്പിയും ധരിച്ചു സുബോധമുള്ളവരായിരിക്കാം.
Verse 9: എന്തെന്നാല്‍, നാം ക്രോധത്തിനിരയാകണമെന്നല്ല നമ്മുടെ കര്‍ത്താവായ യേശുക്രിസ്‌തുവിലൂടെ രക്‌ഷപ്രാപിക്കണമെന്നാണു ദൈവം നിശ്‌ചയിച്ചിട്ടുള്ളത്‌.
Verse 10: ഉറക്കത്തിലും ഉണര്‍വിലും നാം അവനോടൊന്നിച്ചു ജീവിക്കേണ്ടതിനാണ്‌ അവന്‍ നമുക്കുവേണ്ടി മരിച്ചത്‌.
Verse 11: അതിനാല്‍ നിങ്ങള്‍ ഇപ്പോള്‍ ചെയ്യുന്നതുപോലെതന്നെതമ്മില്‍ത്തമ്മില്‍ ആ ശ്വസിപ്പിക്കുകയും പരസ്‌പരോന്നമനത്തിനുവേണ്ടിയത്‌നിക്കുകയും ചെയ്യുവിന്‍.
Verse 12: സഹോദരരേ, നിങ്ങളുടെയിടയില്‍ അധ്വാനിക്കുകയും കര്‍ത്താവില്‍ നിങ്ങളെ നയിക്കുകയും അനുശാസിക്കുകയും ചെയ്യുന്നവരെ
Verse 13: അവരുടെ അധ്വാനം പരിഗണിച്ച്‌ അത്യധികം സ്‌നേഹത്തോടെ ബഹുമാനിക്കണമെന്നു ഞങ്ങള്‍ അഭ്യര്‍ഥിക്കുന്നു.
Verse 14: നിങ്ങള്‍ സമാധാനത്തില്‍ കഴിയുവിന്‍. സഹോദരരേ, നിങ്ങളെ ഞങ്ങള്‍ ഉദ്‌ബോധിപ്പിക്കുന്നു: അലസരെ ശാസിക്കുവിന്‍; ഭീരുക്കളെ ധൈര്യപ്പെടുത്തുവിന്‍; ദുര്‍ബലരെ സഹായിക്കുവിന്‍; എല്ലാ മനുഷ്യരോടും ക്‌ഷമാപൂര്‍വം പെരുമാറുവിന്‍.
Verse 15: ആരും ആരോടും തിന്‍മയ്‌ക്കു പകരം തിന്‍മ ചെയ്യാതിരിക്കാനും തമ്മില്‍ത്തമ്മിലും എല്ലാവരോടും സദാ നന്‍മ ചെയ്യാനും ശ്രദ്‌ധിക്കുവിന്‍.
Verse 16: എപ്പോഴും സന്തോഷത്തോടെയിരിക്കുവിന്‍.
Verse 17: ഇട വിടാതെ പ്രാര്‍ഥിക്കുവിന്‍.
Verse 18: എല്ലാക്കാര്യങ്ങളിലും നന്‌ദി പ്രകാശിപ്പിക്കുവിന്‍. ഇതാണ്‌ യേശുക്രിസ്‌തുവില്‍ നിങ്ങളെ സംബന്‌ധിച്ചുള്ള ദൈവഹിതം.
Verse 19: ആത്‌മാവിനെ നിങ്ങള്‍ നിര്‍വീര്യമാക്കരുത്‌.
Verse 20: പ്രവചനങ്ങളെ നിന്‌ദിക്കരുത്‌.
Verse 21: എല്ലാം പരിശോധിച്ചുനോക്കുവിന്‍. നല്ലവയെ മുറുകെപ്പിടിക്കുവിന്‍.
Verse 22: എല്ലാത്തരം തിന്‍മയിലുംനിന്ന്‌ അകന്നുനില്‍ക്കുകയും ചെയ്യുവിന്‍.
Verse 23: സമാധാനത്തിന്‍െറ ദൈവം നിങ്ങളെ പൂര്‍ണമായി വിശുദ്‌ധീകരിക്കട്ടെ! നമ്മുടെ കര്‍ത്താവായ യേശുക്രിസ്‌തുവിന്‍െറ പ്രത്യാഗമനത്തില്‍ നിങ്ങളുടെ ആത്‌മാവും ജീവനും ശരീരവും അവികലവും പൂര്‍ണവുമായിരിക്കാന്‍ ഇടയാകട്ടെ!
Verse 24: നിങ്ങളെ വിളിക്കുന്നവന്‍ വിശ്വസ്‌തനാണ്‌. അവിടുന്ന്‌ അതനുസരിച്ചു പ്രവര്‍ത്തിക്കുകയും ചെയ്യും.
Verse 25: സഹോദരരേ, ഞങ്ങള്‍ക്കുവേണ്ടി പ്രാര്‍ഥിക്കുവിന്‍.
Verse 26: വിശുദ്‌ധ ചുംബനംകൊണ്ട്‌ എല്ലാ സഹോദരരെയും അഭിവാദനം ചെയ്യുവിന്‍.
Verse 27: ഈ കത്ത്‌ എല്ലാ സഹോദരരെയും വായിച്ചുകേള്‍പ്പിക്കാന്‍ കര്‍ത്താവിന്‍െറ നാമത്തില്‍ നിങ്ങളെ ഞാന്‍ ചുമതലപ്പെടുത്തുന്നു.
Verse 28: നമ്മുടെ കര്‍ത്താവായ യേശുക്രിസ്‌തുവിന്‍െറ കൃപ നിങ്ങളോടുകൂടെ.