Verse 1: ജനങ്ങളില്‍നിന്നു ജനങ്ങള്‍ക്കുവേണ്ടി തിരഞ്ഞെടുക്കപ്പെടുന്ന പ്രധാനപുരോഹിതന്‍, ദൈവികകാര്യങ്ങള്‍ക്കു നിയമിക്കപ്പെടുന്നതു പാപപരിഹാരത്തിനായി ബലികളും കാഴ്‌ചകളും അര്‍പ്പിക്കാനാണ്‌.
Verse 2: അവന്‍ തന്നെ ബലഹീനനായതുകൊണ്ട്‌, അജ്‌ഞരോടും വഴിതെറ്റിയവരോടും വേണ്ടത്ര സഹതാപത്തോടെ പെരുമാറാന്‍ അവനു കഴിയും.
Verse 3: ഇക്കാരണത്താല്‍, അവന്‍ ജനങ്ങളുടെ പാപങ്ങള്‍ക്കുവേണ്ടിയെന്നപോലെ, സ്വന്തംപാപങ്ങള്‍ക്കുവേണ്ടിയും ബലി സമര്‍പ്പിക്കാന്‍ കടപ്പെട്ടിരിക്കുന്നു.
Verse 4: അഹറോനെപ്പോലെ ദൈവത്താല്‍ വിളിക്കപ്പെടുകയല്ലാതെ ആരും സ്വയം ഈ ബഹുമതി ഏറ്റെടുക്കുകയല്ല.
Verse 5: അതുപോലെതന്നെ, ക്രിസ്‌തുവും പ്രധാനപുരോഹിതനാകുന്നതിനു തന്നെത്തന്നെ മഹത്വപ്പെടുത്തിയില്ല. നീ എന്‍െറ പ്രിയപുത്രനാണ്‌. ഇന്നു ഞാന്‍ നിനക്കു ജന്‍മമേകി എന്ന്‌ അവനോടു പറഞ്ഞവന്‍ തന്നെയാണ്‌ അവനെ മഹത്വപ്പെടുത്തിയത്‌.
Verse 6: അവിടുന്ന്‌ വീണ്ടും പറയുന്നു: മെല്‍ക്കിസെദേക്കിന്‍െറ ക്രമപ്രകാരം നീ എന്നേക്കും പുരോഹിതനാണ്‌.
Verse 7: തന്‍െറ ഐഹികജീവിതകാലത്ത്‌ ക്രിസ്‌തു, മരണത്തില്‍നിന്നു തന്നെ രക്‌ഷിക്കാന്‍ കഴിവുള്ളവന്‌ കണ്ണീരോടും വലിയ വിലാപത്തോടുംകൂടെ പ്രാര്‍ഥനകളുംയാചനകളും സമര്‍പ്പിച്ചു. അവന്‍െറ ദൈവഭയംമൂലം അവന്‍െറ പ്രാര്‍ഥന കേട്ടു.
Verse 8: പുത്രനായിരുന്നിട്ടും, തന്‍െറ സഹനത്തിലൂടെ അവന്‍ അനുസരണം അഭ്യസിച്ചു.
Verse 9: പരിപൂര്‍ണനാക്കപ്പെട്ടതുവഴി അവന്‍ തന്നെ അനുസരിക്കുന്നവര്‍ക്കെല്ലാം നിത്യരക്‌ഷയുടെ ഉറവിടമായി.
Verse 10: എന്തെന്നാല്‍, മെല്‍ക്കിസെദേക്കിന്‍െറ ക്രമപ്രകാരം അവന്‍ പ്രധാനപുരോഹിതനായി ദൈവത്താല്‍ നിയോഗിക്കപ്പെട്ടു.
Verse 11: ഇതേക്കുറിച്ച്‌ ഇനിയും ധാരാളം ഞങ്ങള്‍ക്കു പറയാനുണ്ട്‌. നിങ്ങള്‍ ഗ്രഹിക്കുന്നതില്‍ പിന്നോക്കമായതുകൊണ്ട്‌ അതെല്ലാം വിശദീകരിക്കുക വിഷമമാണ്‌.
Verse 12: ഇതിനകം നിങ്ങളെല്ലാവരും പ്രബോധകരാകേണ്ടിയിരുന്നവരാണ്‌. പക്‌ഷേ, ദൈവവചനത്തിന്‍െറ പ്രഥമപാഠങ്ങള്‍പോലും നിങ്ങളെ വീണ്ടും പഠിപ്പിക്കാന്‍ ഒരാള്‍ ആവശ്യമായിരിക്കുന്നു. നിങ്ങള്‍ക്കു പാലാണ്‌ ആവശ്യം, കട്ടിയുള്ള ഭക്‌ഷണമല്ല.
Verse 13: പാലു കുടിച്ചു ജീവിക്കുന്നവന്‍ നീതിയുടെ വചനം വിവേചിക്കാന്‍ വൈദഗ്‌ധ്യമില്ലാത്തവനാണ്‌. എന്തെന്നാല്‍, അവന്‍ ശിശുവാണ്‌.
Verse 14: കട്ടിയുള്ള ഭക്‌ഷണം പക്വത വന്നവര്‍ക്കുളളതാണ്‌. അവര്‍ തങ്ങളുടെ ശക്‌തിവിശേഷങ്ങളുടെ പരിശീലനത്താല്‍ നന്‍മതിന്‍മകളെ വിവേചിച്ചറിയാന്‍ കഴിവുള്ളവരാണ്‌.