Verse 1: നബുക്കദ്‌നേസര്‍ പറഞ്ഞിരുന്നതുപോലെ പതിനെട്ടാംവര്‍ഷം ഒന്നാംമാസം ഇരുപത്തിരണ്ടാം ദിവസം ആ പ്രദേശം മുഴുവന്‍ പ്രതികാരം നടത്തുന്നതിനെപ്പറ്റി അവന്‍െറ കൊട്ടാരത്തില്‍ ആലോചന നടന്നു.
Verse 2: അവന്‍ തന്‍െറ സേവകന്‍മാരെയും പ്രഭുക്കന്‍മാരെയും വിളിച്ചുവരുത്തി തന്‍െറ രഹസ്യ പദ്‌ധതി വിശദീകരിച്ചു. ആ പ്രദേശങ്ങളുടെ ദുഷ്‌കൃത്യങ്ങള്‍ സ്വന്തം നാവുകൊണ്ടു വിവരിച്ചു.
Verse 3: തന്‍െറ കല്‍പന അനുസരിക്കാത്ത ഏവരെയും നശിപ്പിക്കണമെന്നു തീരുമാനിച്ചു.
Verse 4: പദ്‌ധതി അവതരിപ്പിച്ചു കഴിഞ്ഞപ്പോള്‍ അസ്‌സീറിയാരാജാവായ നബുക്കദ്‌നേസര്‍ തനിക്കു നേരേ കീഴിലുള്ള സര്‍വസൈന്യാധിപന്‍ ഹോളോഫര്‍ണസിനെ വിളിച്ചു പറഞ്ഞു:
Verse 5: ഭൂമി മുഴുവന്‍െറയും അധിനാഥനായ ചക്രവര്‍ത്തി അറിയിക്കുന്നു: നീ എന്‍െറ മുന്‍പില്‍നിന്നു പോയാലുടന്‍ ധീരന്‍മാരായ ഒരു ലക്‌ഷത്തിയിരുപതിനായിരം കാലാള്‍പടയെയും പന്തീരായിരം കുതിരപ്പടയാളികളെയും ശേഖരിച്ച്‌
Verse 6: പശ്‌ചിമദേശം മുഴുവന്‍ ആക്രമിക്കുക. അവര്‍ എന്‍െറ കല്‍പന അനുസരിച്ചില്ല. ഞാന്‍ കോപാക്രാന്തനായി വരുകയാണ്‌.
Verse 7: ഭൂമുഖമാസകലം എന്‍െറ സൈന്യങ്ങളുടെ പാദം കൊണ്ടു മറയും. എന്‍െറ പടയാളികള്‍ക്കു കൊള്ളയടിക്കാന്‍ അവരെ ഞാന്‍ ഏല്‍പിച്ചു കൊടുക്കും. അതിനാല്‍, കീഴടങ്ങാന്‍ ഒരുങ്ങിക്കൊള്ളുവിന്‍ എന്ന്‌ അവരോടു പറയുക.
Verse 8: മുറിവേറ്റവര്‍ താഴ്‌വരകളില്‍ നിറയും. അരുവികളും നദികളും മൃതശരീരങ്ങള്‍കൊണ്ടു കവിഞ്ഞൊഴുകും.
Verse 9: ഞാന്‍ അവരെ തടവുകാരാക്കി ലോകത്തിന്‍െറ അറ്റംവരെ പായിക്കും.
Verse 10: നിങ്ങള്‍ മുന്‍പേ പോയി അവരുടെ സ്‌ഥലങ്ങള്‍ എനിക്കുവേണ്ടി പിടിച്ചടക്കുവിന്‍. അവര്‍ നിങ്ങള്‍ക്കു കീഴടങ്ങും. ശിക്‌ഷയുടെ നാള്‍വരെ നിങ്ങള്‍ അവരെ എനിക്കുവേണ്ടി സൂക്‌ഷിക്കുവിന്‍.
Verse 11: അവര്‍ വിസമ്മതിച്ചാല്‍ നിങ്ങള്‍ കണ്ണടച്ചുകളയരുത്‌. രാജ്യം മുഴുവന്‍ കൊലയ്‌ക്കും കൊള്ളയ്‌ക്കുമായി ഏല്‍പിച്ചു കൊടുക്കണം.
Verse 12: ഞാനും എന്‍െറ രാജ്യവുമാണേ, എന്‍െറ വാക്കു ഞാന്‍ നിറവേറ്റും.
Verse 13: നിങ്ങളുടെ രാജാവിന്‍െറ കല്‍പനകള്‍ ലംഘിക്കാതിരിക്കാന്‍ നിങ്ങളും ശ്രദ്‌ധിച്ചുകൊള്ളുവിന്‍. എന്‍െറ കല്‍പന മാറ്റമില്ലാതെ നിര്‍വഹിക്കാന്‍ ശ്രദ്‌ധിക്കുവിന്‍. താമസം വരുത്തരുത്‌.
Verse 14: യജമാനസന്നിധി വിട്ടപ്പോള്‍ത്തന്നെ ഹോളോഫര്‍ണസ്‌ അസ്‌സീറിയന്‍ സൈ ന്യത്തിലെ സേനാപതികള്‍, മറ്റു പടത്തലവന്‍മാര്‍, സേവകന്‍മാര്‍ എന്നിവരെ വിളിച്ചുകൂട്ടി.
Verse 15: യജമാനന്‍ കല്‍പിച്ചതനുസരിച്ച്‌, തിരഞ്ഞെടുത്ത ഒരു ലക്‌ഷത്തിയിരുപതിനായിരം പടയാളികളെയും അശ്വാരൂഢരായ പന്തീരായിരം വില്ലാളികളെയും ഗണങ്ങളായി തിരിച്ചു.
Verse 16: അങ്ങനെ അവന്‍ ആക്രമണ സന്ന ദ്‌ധമായ ഒരു വന്‍സൈന്യത്തെ സജ്‌ജമാക്കി.
Verse 17: അവന്‍ സാധനങ്ങള്‍ കൊണ്ടുപോകാന്‍ അസംഖ്യം ഒട്ടകങ്ങളെയും കഴുതകളെയും കോവര്‍കഴുതകളെയും, ഭക്‌ഷണത്തിനായി അനേകം ചെമ്മരിയാടുകളെയും കാളകളെയും കോലാടുകളെയും സംഭരിച്ചു.
Verse 18: കൂടാതെ, എല്ലാ ആളുകള്‍ക്കും വേണ്ടി ധാരാളം ഭക്‌ഷണസാധനങ്ങളും വലിയൊരു തുകയ്‌ക്കു സ്വര്‍ണവും വെള്ളിയും രാജകൊട്ടാരത്തില്‍ നിന്നു ശേഖരിച്ചു.
Verse 19: ഇപ്രകാരം പശ്‌ചിമ ദേശങ്ങളെല്ലാം തേര്‌, കുതിര, തിരഞ്ഞെടുക്കപ്പെട്ട കാലാള്‍പ്പട ഇവയാല്‍ നിറയ്‌ക്കുവാന്‍ അവന്‍ മുഴുവന്‍ സൈന്യവുമായി നബുക്കദ്‌നേസര്‍ രാജാവിനു മുന്‍പേ പോയി.
Verse 20: വെട്ടുകിളികളെപ്പോലെയും ഭൂമിയിലെ മണല്‍ത്തരിപോലെയും എണ്ണമറ്റ ഒരു സമൂഹം അവരോടുകൂടെ പോയി.
Verse 21: നിനെവേയില്‍നിന്നു മൂന്നുദിവസംയാത്രചെയ്‌ത്‌ അവന്‍ ബക്‌തീലെത്ത്‌ സമതലത്തിലെത്തി. അതിന്‍െറ എതിര്‍വശത്ത്‌, ഉത്തരകിലിക്യയുടെ വടക്കുഭാഗത്തെ പര്‍വ തത്തിനു സമീപം പാളയമടിച്ചു.
Verse 22: അവിടെ നിന്നു ഹോളോഫര്‍ണസ്‌ തന്‍െറ സൈന്യത്തെ മുഴുവന്‍ - കാലാള്‍, കുതിര, തേര്‌ എന്നീ വിഭാഗങ്ങളെയെല്ലാം - കൂട്ടി കുന്നിന്‍പ്രദേശ ത്തേക്കു പോവുകയും,
Verse 23: പുത്‌, ലുദ്‌ എന്നീ ദേശങ്ങള്‍ തകര്‍ക്കുകയും, റാസിസ്‌ നിവാസികളെയും കെലിയാദേശത്തിനു തെക്കുള്ള മരുപ്രദേശങ്ങളില്‍ വസിച്ചിരുന്ന ഇസ്‌മായേ ല്യരെയും കൊള്ളയടിക്കുകയും ചെയ്‌തു.
Verse 24: അനന്തരം,യൂഫ്രട്ടീസിന്‍െറ ഗതി പിന്‍തുടര്‍ന്ന്‌ മെസൊപ്പൊട്ടാമിയായിലൂടെ കടന്ന്‌ അബ്‌റോണ്‍ അരുവിയുടെ കരയിലുള്ള കുന്നിന്‍മുകളില്‍ സ്‌ഥിതി ചെയ്‌തിരുന്ന നഗരങ്ങളെല്ലാം സമുദ്രപര്യന്തം തകര്‍ത്തു.
Verse 25: കിലിക്യന്‍ പ്രദേശങ്ങള്‍ പിടിച്ചടക്കുകയും എതിര്‍ത്തുനിന്നവരെയെല്ലാം വധിക്കുകയും ചെയ്‌തതിനുശേഷം അവന്‍ അറേബ്യയ്‌ക്ക്‌ അഭിമുഖമായി നിലകൊള്ളുന്ന ജാഫെത്തായുടെ തെക്കേ അതിര്‍ത്തികളിലേക്കു കടന്നു.
Verse 26: മിദിയാക്കാരെ വളഞ്ഞ്‌ അവരുടെ കൂടാരങ്ങള്‍ അഗ്‌നിക്കിരയാക്കി, ആട്ടിന്‍പറ്റങ്ങളെ കവര്‍ ച്ചചെയ്‌തു.
Verse 27: അതിനുശേഷം ഗോത മ്പുകൊയ്‌ത്തിന്‍െറ കാലത്ത്‌ അവന്‍ ദമാസ്‌ക്കസ്‌ സമഭൂമിയിലേക്ക്‌ ഇറങ്ങിച്ചെന്ന്‌ വയലുകള്‍ക്കു തീ വയ്‌ക്കുകയും ആടുമാടുകളെ കൊന്നൊടുക്കുകയും നഗരങ്ങള്‍ നിര്‍ജനമാക്കുകയും നിലം ശൂന്യമാക്കുകയുംയുവാക്കളെ വാളിനിരയാക്കുകയും ചെയ്‌തു.
Verse 28: സമുദ്രതീരദേശങ്ങളായ സീദോന്‍, ടയിര്‍ എന്നിവിടങ്ങളിലും, സൂര്‍, ഒക്കിനാ, ജാമ്‌നിയാ, എന്നിവിടങ്ങളിലും നിവസിച്ചിരുന്ന ജനങ്ങള്‍ ഭയചകിതരായിത്തീര്‍ന്നു. അസോത്തൂസിലെയും അസ്‌കേലോണിലെയും ജനങ്ങളും പരിഭ്രാന്തരായി.