Verse 1: പുരോഹിതന്‍മാരേ, കേള്‍ക്കുക. ഇസ്രായേല്‍ ഭവനമേ, ശ്രദ്‌ധിക്കുക. രാജകുടുംബമേ, ശ്രവിക്കുക. നിങ്ങളുടെമേല്‍ വിധി പ്രസ്‌താവിച്ചിരിക്കുന്നു: നിങ്ങള്‍ മിസ്‌പായില്‍ ഒരു കെണിയും, താബോറില്‍ വിരിച്ചവലയുമായിരുന്നു.
Verse 2: ഷിത്തിമില്‍ അവര്‍ ആഴമേറിയ കുഴി കുഴിച്ചു. അവരെ എല്ലാവരെയും ഞാന്‍ ശിക്‌ഷിക്കും.
Verse 3: എഫ്രായിമിനെ എനിക്കറിയാം; ഇസ്രായേല്‍ എന്നില്‍നിന്നു മറഞ്ഞല്ല ഇരിക്കുന്നത്‌. എഫ്രായിം, നീ പരസംഗം ചെയ്‌തു; ഇസ്രായേല്‍ മലിനമാണ്‌.
Verse 4: തങ്ങളുടെ ദൈവത്തിന്‍െറ അടുത്തേക്കു തിരികെപ്പോകാന്‍ അവരുടെ പ്രവൃത്തികള്‍ അവരെ അനുവദിക്കുന്നില്ല. കാരണം, വ്യഭിചാരദുര്‍ഭൂതം അവരില്‍ കുടികൊള്ളുന്നു; അവര്‍ കര്‍ത്താവിനെ അറിയുന്നുമില്ല.
Verse 5: ഇസ്രായേലിന്‍െറ അഹങ്കാരം അവനെതിരേ സാക്‌ഷ്യംനല്‍കുന്നു. എഫ്രായിം തന്‍െറ തിന്‍മയില്‍ തട്ടി വീഴും. യൂദായും അവരോടൊപ്പം കാലിടറി വീഴും.
Verse 6: തങ്ങളുടെ ആട്ടിന്‍പറ്റങ്ങളും കാലിക്കൂട്ടങ്ങളുമായി അവര്‍ കര്‍ത്താവിനെ അന്വേഷിച്ചു പോകും; എന്നാല്‍, അവര്‍ അവിടുത്തെ കണ്ടെണ്ടത്തുകയില്ല; അവിടുന്ന്‌ അവരെ വിട്ടകന്നിരിക്കുന്നു.
Verse 7: അവര്‍ കര്‍ത്താവിനോട്‌ അവിശ്വസ്‌തത കാണിച്ചു. അവര്‍ ജാരസന്തതികള്‍ക്കാണ്‌ ജന്‍മം നല്‍കിയത്‌. അമാവാസി അവരെ അവരുടെ വയലുകളോടൊപ്പം വിഴുങ്ങും.
Verse 8: ഗിബെയായില്‍ കൊമ്പുവിളിക്കുവിന്‍. റാമായില്‍ കാഹളംമുഴക്കുവിന്‍. ബഥാവനില്‍ പോര്‍വിളി നടത്തുവിന്‍. ബഞ്ചമിന്‍,യുദ്‌ധത്തിനു പുറപ്പെടുക.
Verse 9: ശിക്‌ഷയുടെ ദിവസം എഫ്രായിം വിജനമാക്കപ്പെടും. സുനിശ്‌ചിതമായ നാശമാണ്‌ ഇസ്രായേല്‍ഗോത്രങ്ങളോട്‌ ഞാന്‍ പ്രഖ്യാപിക്കുന്നത്‌.
Verse 10: യൂദായുടെ നായകന്‍മാര്‍ അതിര്‍ത്തിരേഖ മാറ്റുന്നവരെപ്പോലെ ആയിരിക്കുന്നു. എന്‍െറ ക്രോധം അവരുടെമേല്‍ ഞാന്‍ വെള്ളംപോലെ ഒഴുക്കും.
Verse 11: എഫ്രായിം മര്‍ദകനാണ്‌. അവന്‍ നീതിയെ ചവിട്ടിമെതിക്കുന്നു. മിഥ്യയെ പിന്തുടരാന്‍ അവന്‍ ഉറച്ചിരിക്കുന്നു.
Verse 12: എഫ്രായിമിനു ഞാന്‍ കീടംപോലെയാണ്‌;യൂദാഭവനത്തിനു വ്രണംപോലെയും.
Verse 13: എഫ്രായിം തന്‍െറ രോഗവും യൂദാ തന്‍െറ മുറിവും കണ്ടപ്പോള്‍, എഫ്രായിം അസ്‌സീറിയായിലേക്കു തിരിഞ്ഞ്‌, മഹാരാജാവിന്‍െറ അടുത്തേക്ക്‌ ആളയച്ചു. എന്നാല്‍, നിങ്ങളെ സുഖപ്പെടുത്താനോ നിങ്ങളുടെ മുറിവ്‌ ഉണക്കാനോ അവനു സാധിക്കുകയില്ല.
Verse 14: ഞാന്‍ എഫ്രായിമിന്‌ ഒരു സിംഹത്തെപ്പോലെയുംയൂദാഭവനത്തിന്‌ ഒരുയുവസിംഹത്തെപ്പോലെയുമായിരിക്കും. ഞാന്‍, അതേ, ഞാന്‍ തന്നെ, അവരെ ചീന്തിക്കളയും. ഞാന്‍ അവരെ ഉപേക്‌ഷിച്ചു പോകും. ഞാന്‍ അവരെ വലിച്ചിഴച്ചു കൊണ്ടുപോകും; ആര്‍ക്കും അവരെ രക്‌ഷിക്കാന്‍ കഴിയുകയില്ല.
Verse 15: അവര്‍ തങ്ങളുടെ തെറ്റുകള്‍ ഏറ്റുപറഞ്ഞ്‌ എന്‍െറ സാന്നിധ്യം തേടുകയും തങ്ങളുടെ വ്യഥയില്‍ എന്നെ അന്വേഷിക്കുകയും ചെയ്യുന്നതുവരെ ഞാന്‍ എന്‍െറ വാസസ്‌ഥലത്തേക്കു മടങ്ങും.