Verse 1: ഒരു ദിവസം ഒമ്പതാംമണിക്കൂറിലെപ്രാര്‍ഥനയ്‌ക്കു പത്രോസും യോഹന്നാനുംദേവാലയത്തിലേക്കു പോവുകയായിരുന്നു.
Verse 2: ജന്‍മനാ മുടന്തനായ ഒരാളെ എടുത്തുകൊണ്ടു ചിലര്‍ അവിടെയെത്തി. ദേവാലയത്തില്‍ പ്രവേശിക്കുന്നവരോടു ഭിക്‌ഷയാചിക്കാനായി സുന്‌ദരകവാടം എന്നു വിളിക്കപ്പെടുന്ന ദേവാലയ വാതില്‍ക്കല്‍ അവനെ കിടത്തുക പതിവായിരുന്നു.
Verse 3: പത്രോസുംയോഹന്നാനും ദേവാലയത്തിലേക്കു പ്രവേശിക്കുന്നതു കണ്ട്‌ അവന്‍ അവരോടു ഭിക്‌ഷയാചിച്ചു.
Verse 4: പത്രോസ്‌ യോഹന്നാനോടൊപ്പം അവനെ സൂക്‌ഷിച്ചുനോക്കിക്കൊണ്ടു പറഞ്ഞു: ഞങ്ങളുടെ നേരേ നോക്കുക.
Verse 5: അവരുടെ പക്കല്‍നിന്ന്‌ എന്തെങ്കിലും കിട്ടുമെന്നു പ്രതീക്‌ഷിച്ച്‌ അവന്‍ അവരെ നോക്കി.
Verse 6: പത്രോസ്‌ പറഞ്ഞു: വെള്ളിയോ സ്വര്‍ണമോ എന്‍െറ കൈയിലില്ല. എനിക്കുള്ളതു ഞാന്‍ നിനക്കു തരുന്നു. നസറായനായ യേശുക്രിസ്‌തുവിന്‍െറ നാമത്തില്‍ എഴുന്നേറ്റു നടക്കുക.
Verse 7: പത്രോസ്‌ വലത്തുകൈയ്‌ക്കു പിടിച്ച്‌ അവനെ എഴുന്നേല്‍പിച്ചു. ഉടന്‍തന്നെ അവന്‍െറ പാദങ്ങളും കണങ്കാലുകളും ബലംപ്രാപിച്ചു.
Verse 8: അവന്‍ ചാടി എഴുന്നേറ്റു നടന്നു. നടന്നും കുതിച്ചുചാടിയും ദൈവത്തെ സ്‌തുതിച്ചും കൊണ്ട്‌ അവന്‍ അവരോടൊപ്പം ദേവാലയത്തില്‍ പ്രവേശിച്ചു.
Verse 9: അവന്‍ നടക്കുന്നതും ദൈവത്തെ സ്‌തുതിക്കുന്നതും ജനമെല്ലാം കണ്ടു.
Verse 10: ദേവാലയത്തിന്‍െറ സുന്‌ദരകവാടത്തിങ്കല്‍ ഭിക്‌ഷയാചിച്ചുകൊണ്ടിരുന്നവനാണ്‌ അവനെന്ന്‌ മന സ്‌സിലാക്കി, അവനു സംഭവി ച്ചകാര്യത്തെക്കുറിച്ച്‌ അവര്‍ അദ്‌ഭുതസ്‌തബ്‌ധരായി.
Verse 11: അവന്‍ പത്രോസിനെയും യോഹന്നാനെയും വിട്ടുമാറാതെ നില്‍ക്കുന്നതു കണ്ടപ്പോള്‍ എല്ലാവരും ആശ്‌ചര്യപ്പെട്ട്‌ സോളമന്‍െറ മണ്‍ഡപത്തില്‍ അവരുടെ അടുത്ത്‌ ഓടിക്കൂടി.
Verse 12: ഇതുകണ്ട്‌ പത്രോസ്‌ അവരോടു പറഞ്ഞു: ഇസ്രായേല്‍ജനമേ, നിങ്ങളെന്തിന്‌ ഇതില്‍ അദ്‌ഭുതപ്പെടുന്നു? ഞങ്ങള്‍ സ്വന്തം ശക്‌തിയോ സുകൃതമോകൊണ്ട്‌ ഇവനു നടക്കാന്‍ കഴിവുകൊടുത്തു എന്ന മട്ടില്‍ ഞങ്ങളെ സൂക്‌ഷിച്ചുനോക്കുന്നതെന്തിന്‌?
Verse 13: അബ്രാഹത്തിന്‍െറയും ഇസഹാക്കിന്‍െറയും യാക്കോബിന്‍െറയും ദൈവം, നമ്മുടെ പിതാക്കന്‍മാരുടെ ദൈവം, തന്‍െറ ദാസനായ യേശുവിനെ മഹത്വപ്പെടുത്തിയിരിക്കുന്നു. നിങ്ങള്‍ അവനെ ഏല്‍പിച്ചുകൊടുത്തു. പീലാത്തോസ്‌ അവനെ വിട്ടയയ്‌ക്കാന്‍ തീരുമാനിച്ചിട്ടും അവന്‍െറ മുമ്പില്‍വച്ച്‌ നിങ്ങള്‍ അവനെ തള്ളിപ്പറഞ്ഞു.
Verse 14: പരിശുദ്‌ധനും നീതിമാനുമായ അവനെ നിങ്ങള്‍ നിരാകരിച്ചു. പകരം ഒരു കൊലപാതകിയെ വിട്ടുകിട്ടാന്‍ അപേക്‌ഷിച്ചു.
Verse 15: ജീവന്‍െറ നാഥനെ നിങ്ങള്‍ വധിച്ചു. എന്നാല്‍, ദൈവം അവനെ മരിച്ചവരില്‍ നിന്ന്‌ ഉയിര്‍പ്പിച്ചു. അതിനു ഞങ്ങള്‍ സാക്‌ഷികളാണ്‌.
Verse 16: അവന്‍െറ നാമത്തിലുള്ള വിശ്വാസംമൂലം, അവന്‍െറ നാമമാണ്‌ നിങ്ങള്‍ കാണുകയും അറിയുകയും ചെയ്യുന്ന ഈ മനുഷ്യനെ സുഖപ്പെടുത്തിയത്‌. അവനിലുള്ള വിശ്വാസമാണ്‌ നിങ്ങളുടെ മുമ്പില്‍വച്ച്‌ ഈ മനുഷ്യനു പൂര്‍ണ്ണാരോഗ്യം പ്രദാനം ചെയ്‌തത്‌.
Verse 17: സഹോദരരേ, നിങ്ങളുടെ നേതാക്കളെപ്പോലെതന്നെ നിങ്ങളും അജ്‌ഞതമൂലമാണ്‌ ഇങ്ങനെ പ്രവര്‍ത്തിച്ചതെന്ന്‌ എനിക്കറിയാം.
Verse 18: എന്നാല്‍, തന്‍െറ അഭിഷിക്‌തന്‍ ഇവയെല്ലാം സഹിക്കണമെന്നു പ്രവാചകന്‍മാര്‍വഴി ദൈവം മുന്‍കൂട്ടി അരുളിച്ചെയ്‌തത്‌ അവിടുന്ന്‌ ഇങ്ങനെ പൂര്‍ത്തിയാക്കി.
Verse 19: അതിനാല്‍, നിങ്ങളുടെപാപങ്ങള്‍ മായിച്ചുകളയാന്‍ പശ്‌ചാത്തപിച്ച്‌ ദൈവത്തിലേക്കു തിരിയുവിന്‍.
Verse 20: നിങ്ങള്‍ക്കു കര്‍ത്താവിന്‍െറ സന്നിധിയില്‍നിന്നു സമാശ്വാസത്തിന്‍െറ കാലം വന്നെത്തുകയും, നിങ്ങള്‍ക്കുവേണ്ടി ക്രിസ്‌തുവായി നിശ്‌ചയിക്കപ്പെട്ടിരിക്കുന്ന യേശുവിനെ അവിടുന്ന്‌ അയയ്‌ക്കുകയും ചെയ്യും.
Verse 21: ആദിമുതല്‍ തന്‍െറ വിശുദ്‌ധ പ്രവാചകന്‍മാര്‍വഴി ദൈവം അരുളിച്ചെയ്‌തതുപോലെ, സകലത്തിന്‍െറയും പുനഃസ്‌ഥാപനകാലം വരെ സ്വര്‍ഗം അവനെ സ്വീകരിക്കേണ്ടിയിരിക്കുന്നു.
Verse 22: മോശ ഇപ്രകാരം പറഞ്ഞു: ദൈവമായ കര്‍ത്താവ്‌ നിങ്ങള്‍ക്കായി, നിങ്ങളുടെ സഹോദരന്‍മാരുടെയിടയില്‍നിന്ന്‌, എന്നെപ്പോലെ ഒരു പ്രവാചകനെ ഉയര്‍ത്തും. അവന്‍ നിങ്ങളോടു പറയുന്നതെല്ലാം നിങ്ങള്‍ കേള്‍ക്കണം.
Verse 23: ആ പ്രവാചകന്‍െറ വാക്കു കേള്‍ക്കാത്തവരെല്ലാം ജനത്തിന്‍െറ ഇടയില്‍നിന്നു പൂര്‍ണമായി വിച്‌ഛേദിക്കപ്പെടും.
Verse 24: സാമുവലും തുടര്‍ന്നുവന്ന പ്രവാചകന്‍മാ രെല്ലാവരും ഈ ദിവസങ്ങളെപ്പറ്റി പ്രഖ്യാപിച്ചിട്ടുണ്ട്‌.
Verse 25: നിങ്ങള്‍ പ്രവാചകന്‍മാരുടെയും നമ്മുടെ പിതാക്കന്‍മാരോടു ദൈവം ചെയ്‌ത ഉടമ്പടിയുടെയും സന്തതികളാണ്‌. അവിടുന്ന്‌ അബ്രാഹത്തോട്‌ അരുളിച്ചെയ്‌തു: ഭൂമിയിലെ എല്ലാ കുടുംബങ്ങളും നിന്‍െറ സന്തതിവഴി അനുഗൃഹീതമാകും.
Verse 26: ദൈവം തന്‍െറ ദാസനെ ഉയിര്‍പ്പിച്ച്‌, ആദ്യം നിങ്ങളുടെ അടുക്കലേക്കാണു നിയോഗിച്ചയച്ചത്‌. നിങ്ങള്‍ ഓരോരുത്തരെയും ദുഷ്‌ടതയില്‍നിന്നു പിന്തിരിപ്പിച്ച്‌ അനുഗ്രഹിക്കാന്‍വേണ്ടിയാണ്‌ അത്‌.