Verse 1: ഇനി വിശുദ്‌ധര്‍ക്കുവേണ്ടിയുള്ള സംഭാവനയെപ്പറ്റി പ്രതിപാദിക്കാം. ഗലാത്തിയായിലെ സഭകളോടു ഞാന്‍ നിര്‍ദേശിച്ചതുപോലെ നിങ്ങളും ചെയ്യുവിന്‍.
Verse 2: ഞാന്‍ വരുമ്പോള്‍ പിരിവൊന്നും നടത്താതിരിക്കുന്നതിന്‌ നിങ്ങള്‍ ഓരോരുത്തരും കഴിവനുസരിച്ചുള്ള തുക ആഴ്‌ചയിലെ ആദ്യദിവസം നീക്കിവയ്‌ക്കണം.
Verse 3: ഞാന്‍ വരുമ്പോള്‍, നിങ്ങളുടെ സംഭാവന കൊണ്ടുപോകുന്നതിനുവേണ്ടി നിങ്ങള്‍ അംഗീകരിക്കുന്ന വ്യക്‌തികളെ എഴുത്തുമായി ജറുസലെമിലേക്കയച്ചുകൊള്ളാം.
Verse 4: ഞാന്‍ കൂടെ പോകേണ്ട ആവശ്യമുണ്ടെങ്കില്‍ അവര്‍ എന്നോടൊപ്പം പോരട്ടെ.
Verse 5: ഞാന്‍ മക്കെദോനിയായില്‍ പോയിട്ട്‌ നിങ്ങളെ സന്‌ദര്‍ശിക്കുന്നതാണ്‌. എനിക്ക്‌ അവിടെ പോകേണ്ടതുണ്ട്‌.
Verse 6: ഞാന്‍ നിങ്ങളുടെ കൂടെ കുറെനാള്‍, ഒരുപക്‌ഷേ ശീതകാലം മുഴുവന്‍, ചെലവഴിച്ചെന്നുവരാം. തദവസരത്തില്‍, എന്‍െറ തുടര്‍ന്നുള്ള എല്ലായാത്ര കള്‍ക്കും വേണ്ട സഹായം ചെയ്‌തുതരാന്‍ നിങ്ങള്‍ക്കു കഴിഞ്ഞേക്കും.
Verse 7: നിങ്ങളെ തിടുക്കത്തില്‍ സന്‌ദര്‍ശിച്ചുപോരാന്‍ ഞാന്‍ ഇഷ്‌ടപ്പെടുന്നില്ല. കര്‍ത്താവ്‌ അനുവദിക്കുമെങ്കില്‍ കുറെനാള്‍ നിങ്ങളോടൊത്തു കഴിയാമെന്ന്‌ ഞാന്‍ ആശിക്കുന്നു.
Verse 8: പന്തക്കുസ്‌താവരെ ഞാന്‍ എഫേസോസില്‍ താമസിക്കും.
Verse 9: ഫലപ്രദമായ പ്രവര്‍ത്തനത്തിനുള്ള ഒരു വലിയ വാതില്‍ എനിക്കു തുറന്നുകിട്ടിയിട്ടുണ്ട്‌. പ്രതിയോഗികളും വളരെയാണ്‌.
Verse 10: തിമോത്തേയോസ്‌ നിങ്ങളുടെ അടുത്തുവരുമ്പോള്‍ നിങ്ങളുടെയിടയില്‍ നിര്‍ഭയനായി കഴിയാന്‍ അവനു സാഹചര്യങ്ങള്‍ ഉണ്ടാക്കിക്കൊടുക്കണം. അവനും എന്നെപ്പോലെ കര്‍ത്താവിന്‍െറ ജോലിയില്‍ വ്യാപൃതനാണല്ലോ.
Verse 11: ആകയാല്‍, ആരും അവനെ നിന്‌ദിക്കാന്‍ ഇടയാകരുത്‌. എന്‍െറ അടുത്തു വേഗം മടങ്ങിവരേണ്ടതിന്‌ സമാധാനത്തില്‍ അവനെയാത്രയാക്കണം. സഹോദരരോടൊപ്പം അവനെ ഞാന്‍ പ്രതീ ക്‌ഷിക്കുന്നു.
Verse 12: മറ്റു സഹോദരരോടൊത്ത്‌ നിങ്ങളെ സന്‌ദര്‍ശിക്കണമെന്ന്‌ ഞാന്‍ നമ്മുടെ സഹോദരന്‍ അപ്പോളോസിനെ വളരെ നിര്‍ബന്‌ധിച്ചതാണ്‌. എന്നാല്‍, ഈ അവസരത്തില്‍ നിങ്ങളുടെ അടുത്തുവരാന്‍ അവന് ഒട്ടും മനസ്‌സില്ലായിരുന്നു; സൗകര്യപ്പെടുമ്പോള്‍ വന്നുകൊള്ളും.
Verse 13: നിങ്ങള്‍ ജാഗരൂകരായിരിക്കുവിന്‍. വിശ്വാസത്തില്‍ ഉറച്ചുനില്‍ക്കുവിന്‍; പൗരുഷ വും കരുത്തും ഉള്ളവരായിരിക്കുവിന്‍.
Verse 14: നിങ്ങളുടെ സകല കാര്യങ്ങളും സ്‌നേഹത്തോടെ നിര്‍വഹിക്കുവിന്‍.
Verse 15: സഹോദരരേ, സ്‌തേഫാനാസിന്‍െറ കുടുംബാംഗങ്ങളാണ്‌ അക്കായിയായിലെ ആദ്യഫലങ്ങളെന്നും അവര്‍ വിശുദ്‌ധരുടെ ശുശ്രൂഷയ്‌ക്കായി തങ്ങളെത്തന്നെ സമര്‍പ്പിച്ചുവെന്നും നിങ്ങള്‍ അറിഞ്ഞിരിക്കണമെന്നു ഞാന്‍ അഭ്യര്‍ഥിക്കുന്നു.
Verse 16: ഇപ്രകാരമുള്ളവരെയും എന്നോടു സഹകരിച്ച്‌ അധ്വാനിക്കുന്ന എല്ലാവരെയും നിങ്ങള്‍ അനുസരിക്കണമെന്ന്‌ ഞാന്‍ നിങ്ങളോട്‌ അപേക്‌ഷിക്കുന്നു.
Verse 17: സ്‌തേഫാനാസും ഫൊര്‍ത്തുനാത്തൂസും ആകായിക്കോസും വന്നതില്‍ ഞാന്‍ ആഹ്ലാദിക്കുന്നു. എന്തെന്നാല്‍, നിങ്ങളുടെ അസാന്നിധ്യം അവര്‍ പരിഹരിച്ചു.
Verse 18: അവര്‍ എന്‍െറയും നിങ്ങളുടെയും ആത്‌മാവിനെ ഉന്‍മേഷപ്പെടുത്തി. ഇങ്ങനെയുള്ളവരെ നിങ്ങള്‍ അംഗീകരിക്കണം.
Verse 19: ഏഷ്യയിലെ സഭകള്‍ നിങ്ങളെ അഭിവാദനം ചെയ്യുന്നു. അക്വീലായും പ്രിസ്‌ക്കായും അവരുടെ വീട്ടിലുള്ള സഭയും കര്‍ത്താവില്‍ നിങ്ങളെ ഹൃദയപൂര്‍വം അഭിവാദനംചെയ്യുന്നു.
Verse 20: സകല സഹോദരരും നിങ്ങളെ അഭിവാദനം ചെയ്യുന്നു. നിങ്ങള്‍ വിശുദ്‌ധ ചുംബനത്താല്‍ അന്യോന്യം അഭിവാദനം ചെയ്യുവിന്‍.
Verse 21: പൗലോസായ ഞാന്‍ സ്വന്തം കൈപ്പടയില്‍ അഭിവാദനം രേഖപ്പെടുത്തുന്നു.
Verse 22: ആരെങ്കിലും കര്‍ത്താവിനെ സ്‌നേഹിക്കുന്നില്ലെങ്കില്‍ അവന് ശപിക്കപ്പെട്ടവനാകട്ടെ! ഞങ്ങളുടെ കര്‍ത്താവേ, വന്നാലും!
Verse 23: കര്‍ത്താവായ യേശുവിന്‍െറ കൃപ നിങ്ങളോടു കൂടെ ഉണ്ടായിരിക്കട്ടെ!
Verse 24: യേശുക്രിസ്‌തുവില്‍ എന്‍െറ സ്‌നേഹം നിങ്ങളെല്ലാവരോടുംകൂടെ ഉണ്ടായിരിക്കട്ടെ!