Verse 1: വിജാതീയരുടെയിടയില്‍പ്പോലും ഇല്ലാത്തതരം അവിഹിതബന്‌ധങ്ങള്‍ നിങ്ങളുടെയിടയിലുണ്ടെന്നു കേള്‍ക്കുന്നു. നിങ്ങളില്‍ ഒരാള്‍ സ്വന്തം പിതാവിന്‍െറ ഭാര്യയുമായി അവിഹിതമായ വേഴ്‌ചയില്‍ കഴിയുന്നു!
Verse 2: എന്നിട്ടും നിങ്ങള്‍ അഹങ്കരിക്കുന്നു! വാസ്‌ത വത്തില്‍ നിങ്ങള്‍ വിലപിക്കുകയല്ലേ വേണ്ടത്‌? ഇങ്ങനെ പ്രവര്‍ത്തിച്ചവനെ നിങ്ങളില്‍നിന്നു നീക്കിക്കളയുവിന്‍.
Verse 3: ശാരീരികമായിട്ടല്ലെങ്കിലും ആത്‌മീയമായി ഞാന്‍ അവിടെ സന്നിഹിതനായി
Verse 4: ഈ പ്രവൃത്തി ചെയ്‌തവനെ നമ്മുടെ കര്‍ത്താവായ യേശുവിന്‍െറ നാമത്തില്‍ വിധിച്ചുകഴിഞ്ഞു. നമ്മുടെ കര്‍ത്താവായ യേശുവിന്‍െറ നാമത്തിലും എന്‍െറ ആത്‌മീയ സാന്നിധ്യത്തിലും നിങ്ങള്‍ ഒരുമിച്ചുകൂടുമ്പോള്‍, നമ്മുടെ കര്‍ത്താവായ യേശുവിന്‍െറ അധികാരമുപയോഗിച്ച്‌
Verse 5: ആ മനുഷ്യനെ അവന്‍െറ അധമവികാരങ്ങള്‍ ഇല്ലായ്‌മ ചെയ്യേണ്ടതിന്‌ പിശാചിന്‌ ഏല്‍പിച്ചുകൊടുക്കണം. അങ്ങനെ അവന്‍െറ ആത്‌മാവ്‌ കര്‍ത്താവായ യേശുവിന്‍െറ ദിനത്തില്‍ രക്‌ഷപ്രാപിക്കട്ടെ.
Verse 6: നിങ്ങളുടെ ആത്‌മപ്രശംസ ഒട്ടും നന്നല്ല. അല്‍പം പുളിപ്പ്‌ മുഴുവന്‍മാവിനെയും പുളിപ്പിക്കുമെന്നു നിങ്ങള്‍ക്ക്‌ അറിവുള്ളതല്ലേ?
Verse 7: നിങ്ങള്‍ പുളിപ്പില്ലാത്ത പുതിയ മാവ്‌ ആകേണ്ടതിന്‌ പഴയ പുളിപ്പ്‌ നീക്കിക്കളയുവിന്‍. നിങ്ങള്‍ പുളിപ്പില്ലാത്തവര്‍ ആയിരിക്കേണ്ടവരാണല്ലോ. എന്തെന്നാല്‍, നമ്മുടെ പെസഹാക്കുഞ്ഞാടായ ക്രിസ്‌തു ബലിയര്‍പ്പിക്കപ്പെട്ടിരിക്കുന്നു.
Verse 8: അതിനാല്‍, അശുദ്‌ധിയും തിന്‍മയുമാകുന്ന പഴയ പുളിപ്പുകൊണ്ടല്ല, ആത്‌മാര്‍ഥതയും സത്യവുമാകുന്ന പുളിപ്പില്ലാത്ത അപ്പംകൊണ്ട്‌ നമുക്കു തിരുനാള്‍ ആഘോഷിക്കാം.
Verse 9: വ്യഭിചാരികളുമായി സമ്പര്‍ക്കമരുതെന്നു മറ്റൊരു ലേഖനത്തില്‍ ഞാന്‍ എഴുതിയിരുന്നല്ലോ.
Verse 10: ലോകത്തിലെ വ്യഭിചാരികളെയും അത്യാഗ്രഹികളെയും കള്ളന്‍മാരെയും വിഗ്രഹാരാധകരെയും ഒന്നടങ്കമല്ല ഞാന്‍ വിവക്‌ഷിച്ചത്‌. അങ്ങനെയായിരുന്നെങ്കില്‍ നിങ്ങള്‍ ലോകത്തില്‍നിന്നുതന്നെ പുറത്തുപോകേണ്ടിവരുമായിരുന്നു.
Verse 11: പ്രത്യുത, സഹോദരന്‍ എന്നു വിളിക്കപ്പെടുന്നവന്‍ അസന്‍മാര്‍ഗിയോ അത്യാഗ്രഹിയോ വിഗ്ര ഹാരാധകനോ പരദൂഷകനോ മദ്യപനോ ക ള്ളനോ ആണെന്നുകണ്ടാല്‍ അവനുമായി സംസര്‍ഗം പാടില്ലെന്നാണ്‌ ഞാന്‍ എഴുതിയത്‌. അവനുമൊരുമിച്ചു ഭക്‌ഷണം കഴിക്കുകപോലുമരുത്‌.
Verse 12: പുറമേയുള്ളവരെ വിധിക്കാന്‍ എനിക്കെന്തുകാര്യം? സഭയിലുള്ളവരെയല്ലേ നിങ്ങള്‍ വിധിക്കേണ്ടത്‌?
Verse 13: പുറമേയുള്ളവരെ ദൈവം വിധിച്ചുകൊള്ളും. ദുഷ്‌ടനെ നിങ്ങളുടെ ഇടയില്‍നിന്നു നീക്കിക്കളയുവിന്‍.