Verse 1: പത്തു വിരികള്‍കൊണ്ടു നീ വിശുദ്‌ധകൂടാരം നിര്‍മിക്കണം. നീലം, ധൂമ്രം, കടുംചെമപ്പ്‌ എന്നീ നിറങ്ങളോടുകൂടി നെയ്‌തെ ടുത്ത നേര്‍ത്ത ചണവസ്‌ത്രം കൊണ്ടായിരിക്കണം വിരികള്‍: കെരൂബുകളെക്കൊണ്ടു വിദഗ്‌ധമായി അലങ്കരിച്ചതുമായിരിക്കണം.
Verse 2: ഒരു വിരിയുടെ നീളം ഇരുപത്തെട്ടു മുഴവും വീതി നാലു മുഴവുമായിരിക്കണം: എല്ലാ വിരികളും ഒരേ അളവിലുള്ളതായിരിക്കണം.
Verse 3: അഞ്ചു വിരികള്‍ ഒന്നോടൊന്നു ചേര്‍ത്തുതുന്നണം. അതുപോലെ മറ്റേ അഞ്ചു വിരികളും.
Verse 4: ആദ്യഗണം വിരികളില്‍ ഒടുവിലത്തേതിന്‍െറ വക്കില്‍ നീല നൂല്‍കൊണ്ടു വളയങ്ങള്‍ തുന്നിച്ചേര്‍ക്കണം; അപ്രകാരംതന്നെ, രണ്ടാംഗണം വിരികളില്‍ അവസാനത്തേതിന്‍െറ വക്കിലും.
Verse 5: ആദ്യത്തെ വിരിയില്‍ അന്‍പതു വളയങ്ങള്‍ ഉണ്ടാക്കണം. രണ്ടാം ഗണം വിരികളില്‍ അവസാനത്തേതിന്‍െറ വക്കിലും അന്‍പതു വളയങ്ങള്‍ ഉണ്ടാക്കണം. വളയങ്ങള്‍ ഒന്നിനുനേരേ ഒന്നു വരത്തക്കവിധത്തിലായിരിക്കണം.
Verse 6: സ്വര്‍ണംകൊണ്ട്‌ അന്‍പതു കൊളുത്തുകള്‍ ഉണ്ടാക്കണം. ഇരുഗണം വിരികളും കൊളുത്തുകൊണ്ടു യോജിപ്പിക്കുമ്പോള്‍ അതൊരു കൂടാരമാകും.
Verse 7: കൂടാരത്തിന്‍െറ മുകള്‍ഭാഗം മൂടുന്നതിനായി ആട്ടിന്‍രോമം കൊണ്ടു പതിനൊന്നു വിരികള്‍ ഉണ്ടാക്കണം.
Verse 8: ഓരോ വിരിക്കും മുപ്പതുമുഴം നീളവും നാലുമുഴം വീതിയുമുണ്ടായിരിക്കണം. പതിനൊന്നു വിരികളും ഒരേ അളവിലായിരിക്കണം.
Verse 9: അഞ്ചു വിരികള്‍ യോജിപ്പിച്ച്‌ ഒരു ഗണവും ആറു വിരികള്‍ യോജിപ്പിച്ച്‌ വേറൊരു ഗണവും ഉണ്ടാക്കുക. ആറാമത്തെ വിരി കൂടാരത്തിന്‍െറ മുന്‍ഭാഗത്തു മടക്കിയിടുക.
Verse 10: ഒന്നാമത്തെ ഗണം വിരികളില്‍ അവസാനത്തേതിന്‍െറ വക്കില്‍ അന്‍പതു വളയങ്ങളും രണ്ടാംഗണം വിരികളില്‍ അവസാനത്തേതിന്‍െറ വക്കില്‍ അന്‍പതു വളയങ്ങളും തുന്നിച്ചേര്‍ക്കുക.
Verse 11: ഓടുകൊണ്ടുള്ള അന്‍പതു കൊളുത്തുകളുണ്ടാക്കി, അവ വളയങ്ങളിലൂടെ ഇട്ട്‌ കൂടാരം ഒന്നായി യോജിപ്പിക്കുക.
Verse 12: അവശേഷിക്കുന്ന ഒരു പകുതിവിരി കൂടാരത്തിന്‍െറ പിന്നില്‍ തൂക്കിയിടണം.
Verse 13: മേല്‍വിരിയുടെ നീളത്തില്‍ ഓരോ വശത്തും അവശേഷിക്കുന്ന ഓരോ മുഴം ഇരുവശങ്ങളും മറയ്‌ക്കാനായി തൂക്കിയിടണം.
Verse 14: ഊറയ്‌ക്കിട്ട മുട്ടാടിന്‍ തോലുകൊണ്ടു കൂടാരത്തിനു മൂടി ഉണ്ടാക്കണം. മൃദുലമായ തോലുകൊണ്ടു വേറൊരു ആവരണവും ഉണ്ടാക്കണം.
Verse 15: കരുവേലമരത്തിന്‍െറ പലകകള്‍കൊണ്ടു കൂടാരത്തിനു നിവര്‍ന്നു നില്‍ക്കുന്ന ചട്ടങ്ങള്‍ ഉണ്ടാക്കണം.
Verse 16: ഓരോ പലകയുടെയും നീളം പത്തുമുഴവും വീതി ഒന്നരമുഴവും ആയിരിക്കണം.
Verse 17: പലകകളെ തമ്മില്‍ച്ചേര്‍ക്കുന്നതിനു ഓരോ പലകയിലും രണ്ടു കുടുമകള്‍വീതം വേണം. എല്ലാപലകകളും ഇങ്ങനെതന്നെ ഉണ്ടാക്കണം.
Verse 18: കൂടാരത്തിനു ചട്ടപ്പലകകള്‍ ഉണ്ടാക്കണം; തെക്കുവശത്ത്‌ ഇരുപതു പലകകള്‍.
Verse 19: ഇരുപതു പലകകളുടെ അടിയിലായി വെള്ളികൊണ്ടു നാല്‍പതു പാദകുടങ്ങള്‍ ഉണ്ടാക്കണം; ഓരോ പലകയുടെയും അടിയിലുള്ള രണ്ടു കുടുമകള്‍ക്ക്‌ രണ്ടു പാദകുടങ്ങള്‍ വീതം.
Verse 20: കൂടാരത്തിന്‍െറ രണ്ടാംവശമായ വടക്കുവശത്തേക്കായി ഇരുപതു പലകകള്‍ നിര്‍മിക്കണം.
Verse 21: ഓരോ പലകയ്‌ക്കുമിടയില്‍ രണ്ടുവീതം വെള്ളികൊണ്ട്‌ നാല്‍പതു പാദകുടങ്ങള്‍ ഉണ്ടായിരിക്കണം.
Verse 22: കൂടാരത്തിന്‍െറ പിന്‍ഭാഗമായ പടിഞ്ഞാറുവശത്തേക്കായി ആറു പലകകള്‍ നിര്‍മിക്കണം.
Verse 23: കൂടാരത്തിന്‍െറ പിന്‍ഭാഗത്തെ രണ്ടു മൂലകള്‍ക്കായി രണ്ടു പലകകള്‍ ഉണ്ടാക്കണം.
Verse 24: അവയുടെ ചുവടുകള്‍ അകന്നുനില്‍ക്കണം; മുകളില്‍ അവ ഒരു വളയംകൊണ്ടു യോജിപ്പിക്കണം. രണ്ടു പല കകള്‍ക്കും ഇപ്രകാരംതന്നെ. അവ രണ്ടും മൂലപ്പലകകളായിരിക്കും.
Verse 25: അങ്ങനെ എട്ടു പലകകളും ഓരോ പലകയുടെയും അടിയില്‍ രണ്ടുവീതം വെള്ളികൊണ്ടുള്ള പതിനാറു പാദകുടങ്ങളുമുണ്ടായിരിക്കണം.
Verse 26: കരുവേലമരംകൊണ്ട്‌ അഴികള്‍ ഉണ്ടാക്കണം. കൂടാരത്തിന്‍െറ ആദ്യവശത്തെ പലകകള്‍ക്ക്‌ അഞ്ച്‌ അഴികള്‍ വേണം.
Verse 27: കൂടാരത്തിന്‍െറ രണ്ടാമത്തെ വശത്തുള്ള പല കകള്‍ക്ക്‌ അഞ്ച്‌ അഴികളും പിന്‍ഭാഗമായ പടിഞ്ഞാറു വശത്തുള്ള പലകകള്‍ക്ക്‌ അഞ്ച്‌ അഴികളും ഉണ്ടാക്കണം.
Verse 28: നടുവിലെ അഴി പലകകളുടെ മധ്യത്തിലൂടെ ഒരറ്റം മുതല്‍ മറ്റേ അറ്റംവരെ എത്തണം.
Verse 29: പലകകള്‍ സ്വര്‍ണം കൊണ്ടു പൊതിയണം. അഴികള്‍ കടത്തുന്നതിന്‌ അവയില്‍ സ്വര്‍ണം കൊണ്ടു വളയങ്ങള്‍ നിര്‍മിക്കണം. അഴികളും സ്വര്‍ണംകൊണ്ടു പൊതിയണം.
Verse 30: മലയില്‍വച്ചു കാണിച്ചുതന്ന മാതൃകയനുസരിച്ചാണ്‌ കൂടാരം പണിയേണ്ടത്‌.
Verse 31: പിരി ച്ചനൂല്‍കൊണ്ടു നെയ്‌തതും നീലം, ധൂമ്രം, കടുംചെമപ്പ്‌ എന്നീ നിറങ്ങളുള്ളതുമായ നേര്‍ത്ത ചണത്തുണികൊണ്ട്‌ ഒരു തിരശ്‌ശീല ഉണ്ടാക്കണം. അതില്‍ കെരൂബുകളെ തുന്നിച്ചേര്‍ക്കണം.
Verse 32: കരുവേലമരംകൊണ്ടു പണിതു സ്വര്‍ണം പൊതിഞ്ഞനാലു തൂണുകളില്‍ അതു തൂക്കിയിടണം. തൂണുകളുടെ കൊളുത്തുകള്‍ സ്വര്‍ണംകൊണ്ടും പാദകുടങ്ങള്‍ വെള്ളികൊണ്ടും നിര്‍മിക്കണം.
Verse 33: തിരശ്‌ശീല കൊളുത്തുകളില്‍ തൂക്കിയിട്ടതിനുശേഷം സാക്‌ഷ്യപേടകം അതിനുള്ളിലേക്കു കൊണ്ടുവരണം. ഈ തിര ശ്‌ശീല വിശുദ്‌ധസ്‌ഥലത്തുനിന്നു ശ്രീകോവിലിനെ വേര്‍തിരിക്കും.
Verse 34: ശ്രീകോവിലില്‍ സാക്‌ഷ്യ പേടകത്തിനു മുകളില്‍ കൃപാസനം സ്‌ഥാപിക്കണം.
Verse 35: തിരശ്‌ശീലയ്‌ക്കുവെളിയില്‍ മേശയും മേശയ്‌ക്കെതിരേ കൂടാരത്തിന്‍െറ തെക്കുവശത്തു വിളക്കുകാലും സ്‌ഥാപിക്കണം. മേശ കൂടാരത്തിന്‍െറ വടക്കുവശത്തായിരിക്കണം.
Verse 36: നേര്‍മയില്‍ നെയ്‌തതും നീലം, ധൂമ്രം, കടുംചെമപ്പ്‌ എന്നീ നിറങ്ങളുള്ളതും ചിത്രത്തുന്നലാല്‍ അലംകൃതവുമായ ചണവസ്‌ത്രംകൊണ്ട്‌ കൂടാരവാതിലിന്‌ ഒരുയവനിക ഉണ്ടാക്കണം.
Verse 37: ഈയവനിക തൂക്കിയിടുന്നതിന്‌ കരുവേലമരംകൊണ്ട്‌ അഞ്ചു തൂണുകള്‍ ഉണ്ടാക്കണം. അവ സ്വര്‍ണത്തില്‍ പൊതിയണം. അവയ്‌ക്കു സ്വര്‍ണക്കൊളുത്തുകളും ഓടുകൊണ്ടുള്ള അഞ്ചു പാദകുടങ്ങളുമുണ്ടായിരിക്കണം.