Verse 1: അമ്മോന്യരുടെ രാജാവ്‌ മരിച്ചു. അവന്‍െറ മകന്‍ ഹാനൂന്‍ രാജാവായി.
Verse 2: അപ്പോള്‍ ദാവീദ്‌ പറഞ്ഞു: നാഹാഷ്‌ എന്നോടു കാണിച്ചതുപോലെ അവന്‍െറ മകന്‍ ഹാനൂനോടു ഞാനും ദയ കാണിക്കും. പിതാവിന്‍െറ മരണത്തില്‍ അനുശോചനമറിയിക്കാന്‍ ദാവീദ്‌ ഒരു സംഘം ദൂതന്‍മാരെ ഹാനൂന്‍െറ അടുത്തേക്കയച്ചു.
Verse 3: അവര്‍ അമ്മോന്യരുടെദേശത്ത്‌ എത്തി. എന്നാല്‍ അമ്മോന്യപ്രഭുക്കന്‍മാര്‍ രാജാവായ ഹാനൂനോടു പറഞ്ഞു: നിന്നെ ആശ്വസിപ്പിക്കാന്‍ ദാവീദ്‌ ദൂതന്‍മാരെ അയച്ചത്‌ നിന്‍െറ പിതാവിനോടുള്ള ബഹുമാനം കൊണ്ടാണെന്നു നീ വിശ്വസിക്കുന്നുവോ? അവര്‍ ഒറ്റുകാരാണ്‌. നഗരം നശിപ്പിക്കാനുള്ള മാര്‍ഗം അറിയാനാണ്‌ അവന്‍ അവരെ അയച്ചിരിക്കുന്നത്‌.
Verse 4: ഹാനൂന്‍ ദാവീദിന്‍െറ ഭൃത്യന്‍മാരെ പിടിച്ച്‌ അവരുടെ താടി പകുതി വീതം ക്‌ഷൗരം ചെയ്യിച്ചും വസ്‌ത്രം നടുവില്‍ നിതംബംവരെ കീറിയും വിട്ടയച്ചു.
Verse 5: ദാവീദ്‌ അതുകേട്ട്‌ അത്യന്തം അപമാനിതരായ അവരോട്‌ ആളയച്ച്‌ പറഞ്ഞു: താടി വളരുംവരെ ജറീക്കോയില്‍ താമസിക്കുവിന്‍. പിന്നെ മടങ്ങിപ്പോകുവിന്‍.
Verse 6: ദാവീദിന്‍െറ ശത്രുത സമ്പാദിച്ചുവെന്ന്‌ ഗ്രഹിച്ചപ്പോള്‍ അമ്മോന്യര്‍ ബത്‌റെഹോബിലെയും സോബായിലെയും സിറിയാക്കാരില്‍നിന്ന്‌ ഇരുപതിനായിരം കാലാള്‍പ്പടയെയും ആയിരംപേരോടുകൂടെ മാഖാരാജാവിനെയും തോബില്‍നിന്നു പന്തീരായിരംപേരെയും കൂലിക്കെടുത്തു.
Verse 7: അതുകേട്ട്‌ ദാവീദ്‌ യോവാബിനെ സകല വീരപടയാളികളുമായി അ യച്ചു.
Verse 8: അമ്മോന്യര്‍ നഗരവാതില്‍ക്കല്‍ അണിനിരന്നു. സോബായിലെയും റഹോബിലെയും സിറിയാക്കാരും തോബിലെയും മാഖായിലെയും പടയാളികളും വെളിമ്പ്രദേശത്തു നിലയുറപ്പിച്ചു.
Verse 9: ശത്രുസൈന്യം മുന്‍പിലും പിന്‍പിലും നിലയുറപ്പിച്ചിരിക്കുന്നെന്നു കണ്ടപ്പോള്‍ യോവാബ്‌ ഇസ്രായേലിന്‍െറ അതിധീരരായ ഒരുകൂട്ടം പടയാളികളെ തിരഞ്ഞെടുത്ത്‌ സിറിയാക്കാര്‍ക്കെതിരേ അണിനിരത്തി.
Verse 10: ശേഷി ച്ചസൈന്യത്തെ തന്‍െറ സഹോദരന്‍ അബിഷായിയുടെ ചുമതലയിലേല്‍പിച്ചു. അബിഷായി അവരെ അമ്മോന്യര്‍ക്കെതിരേ അണിനിരത്തി. യോവാബ്‌ അബിഷായിയോടു പറഞ്ഞു:
Verse 11: സിറിയാക്കാര്‍ എന്നെ തോല്‍പിക്കുമെന്നു കണ്ടാല്‍, നീ വന്ന്‌ എന്നെ സഹായിക്കുക; അമ്മോന്യര്‍ നിന്നെ തോല്‍പിക്കുമെന്നുകണ്ടാല്‍, ഞാന്‍ വന്ന്‌ നിന്നെ സഹായിക്കാം. ധൈര്യമായിരിക്കുക.
Verse 12: നമ്മുടെ ജനത്തിനുവേണ്ടിയും നമ്മുടെ ദൈവത്തിന്‍െറ നഗരങ്ങള്‍ക്കുവേണ്ടിയും നമുക്കു ധീരമായി പോരാടാം. ദൈവേഷ്‌ടംപോലെ ഭവിക്കട്ടെ!
Verse 13: അങ്ങനെ യോവാബും കൂടെയുള്ള സൈന്യവും സിറിയാക്കാരോടുയുദ്‌ധം ചെയ്യാനടുത്തു.
Verse 14: അവര്‍ പലായനം ചെയ്‌തു. സിറിയാക്കാര്‍ തോറ്റോടുന്നതു കണ്ടപ്പോള്‍ അമ്മോന്യരും അബിഷായിയുടെ മുന്‍പില്‍നിന്നോടി നഗരത്തില്‍ കടന്നു. യോവാബ്‌ അമ്മോന്യരോടുള്ളയുദ്‌ധം അവസാനിപ്പിച്ചു ജറുസലെമിലേക്കു മടങ്ങിപ്പോന്നു.
Verse 15: ഇസ്രായേല്‍ തങ്ങളെ തോല്‍പിച്ചെന്നു കണ്ടപ്പോള്‍ സിറിയാക്കാര്‍ ഒരുമിച്ചുകൂടി.
Verse 16: ഹദദേസര്‍ ആളയച്ച്‌യൂഫ്രട്ടീസ്‌ നദിക്കപ്പുറത്തുള്ള സിറിയാക്കാരെ വരുത്തി. ഹദദേസറിന്‍െറ സൈന്യാധിപനായ ഷോബക്കിന്‍െറ നേതൃത്വത്തില്‍ അവര്‍ ഹേലാമിലേക്കു വന്നു.
Verse 17: ദാവീദ്‌ അതറിഞ്ഞ്‌ ഇസ്രായേലിനെ മുഴുവന്‍ ഒരുമിച്ചുകൂട്ടി ജോര്‍ദാന്‍ കടന്നു ഹേലാമിലെത്തി.
Verse 18: സിറിയാക്കാര്‍ ദാവീദിനെതിരേ അണിനിരന്നുയുദ്‌ധംചെയ്‌തു. സിറിയാക്കാര്‍ ഇസ്രായേലിന്‍െറ മുന്‍പില്‍തോറ്റോടി. എഴുനൂറു തേരാളികളെയും നാല്‍പതിനായിരം കുതിരപ്പടയാളികളെയും ദാവീദ്‌ കൊന്നു. അവരുടെ സൈന്യാധിപ നായ ഷോബക്ക്‌ മുറിവേറ്റ്‌ അവിടെവച്ചു മരിച്ചു.
Verse 19: ഇസ്രായേല്‍ തങ്ങളെ തോല്‍പിച്ചുവെന്നു കണ്ടപ്പോള്‍ ഹദദേസറിന്‍െറ സാമന്തന്‍മാര്‍ ഇസ്രായേലുമായി ഉടമ്പടി ചെയ്‌തു; ആശ്രിതരായി. അതിനുശേഷം അമ്മോന്യരെ സഹായിക്കാന്‍ സിറിയാക്കാര്‍ക്കു ഭയമായി.