Verse 1: യാക്കോബിനു ലെയായിലുണ്ടായ മകള്‍ ദീന ആ നാട്ടിലുള്ള സ്‌ത്രീകളെ സന്‌ദര്‍ശിക്കാന്‍ പോയി.
Verse 2: അവിടത്തെ പ്രഭുവായിരുന്ന ഹാമോര്‍ എന്ന ഹിവ്യന്‍െറ മകന്‍ ഷെക്കെം അവളെ കണ്ടപ്പോള്‍ പിടിച്ചുകൊണ്ടു പോയി ബലാല്‍സംഗം ചെയ്‌ത്‌ അപമാനിച്ചു.
Verse 3: അവന്‍െറ ഹൃദയം യാക്കോബിന്‍െറ മകളായ ദീനയില്‍ ലയിച്ചു ചേര്‍ന്നു. അവന്‍ അവളെ അതിരറ്റു സ്‌നേഹിച്ചു. സ്‌നേഹവായ്‌പോടെ അവന്‍ അവളോടു സംസാരിച്ചു.
Verse 4: ഷെക്കെം തന്‍െറ പിതാവായ ഹാമോറിനോടു പറഞ്ഞു: ആ പെണ്‍കുട്ടിയെ എനിക്കു ഭാര്യയായിത്തരണം.
Verse 5: തന്‍െറ മകളായ ദീനയെ ഷെക്കെം മാനഭംഗപ്പെടുത്തിയെന്ന വിവരം യാക്കോബ്‌ അറിഞ്ഞു. പുത്രന്‍മാരെല്ലാവരും വയലില്‍ കാലികളുടെകൂടെ ആയിരുന്നതുകൊണ്ട്‌ അവര്‍ തിരിച്ചെത്തുംവരെ അവന്‍ ക്‌ഷമിച്ചിരുന്നു.
Verse 6: ഷെക്കെമിന്‍െറ പിതാവായ ഹാമോര്‍ യാക്കോബിനോടു സംസാരിക്കാനായി വന്നു.
Verse 7: വിവരമറിഞ്ഞ്‌ യാക്കോബിന്‍െറ പുത്രന്‍മാര്‍ വയലില്‍നിന്നു തിരിച്ചെത്തി. അവര്‍ക്കു രോഷവും അമര്‍ഷ വുമുണ്ടായി. കാരണം, യാക്കോബിന്‍െറ മകളെ ബലാത്‌സംഗം ചെയ്‌തതു വഴി, ഷെക്കെം ഇസ്രായേലിനു നിഷിദ്‌ധമായ മ്ലേച്ഛ തയാണു പ്രവര്‍ത്തിച്ചത്‌.
Verse 8: എന്നാല്‍, ഹാമോര്‍ അവരോടു പറഞ്ഞു: എന്‍െറ മകനായ ഷെക്കെമിന്‍െറ ഹൃദയം നിങ്ങളുടെ മകള്‍ക്കുവേണ്ടി ദാഹിക്കുന്നു. ദയചെയ്‌ത്‌ അവളെ അവനു ഭാര്യയായി നല്‍കണം.
Verse 9: ഞങ്ങളുമായി വിവാഹബന്‌ധത്തിലേര്‍പ്പെടുക. നിങ്ങളുടെപെണ്‍കുട്ടികളെ ഞങ്ങള്‍ക്കു തരുക. ഞങ്ങളുടെ പെണ്‍കുട്ടികളെ നിങ്ങളും സ്വീകരിക്കുക.
Verse 10: ഞങ്ങളുടെകൂടെ പാര്‍ക്കുക. ഈ നാട്ടില്‍ നിങ്ങള്‍ക്കു സ്വാതന്ത്യ്രമുണ്ടായിരിക്കും. നിങ്ങള്‍ക്ക്‌ ഇവിടെ പാര്‍ത്ത്‌ തൊഴില്‍ ചെയ്യുകയും സ മ്പാദ്യമുണ്ടാക്കുകയും ചെയ്യാം.
Verse 11: ഷെക്കെം ദീനയുടെ പിതാവിനോടും സഹോദരന്‍മാരോടുമായി പറഞ്ഞു: ദയയോടെ നിങ്ങള്‍ എന്നോടു പെരുമാറണം. നിങ്ങള്‍ ചോദിക്കുന്നതു ഞാന്‍ നിങ്ങള്‍ക്കു തരാം.
Verse 12: സ്‌ത്രീധനമായോ വിവാഹസമ്മാനമായോ നിങ്ങള്‍ ചോദിക്കുന്നതെന്തും തരാന്‍ ഞാന്‍ ഒരുക്ക മാണ്‌. പെണ്‍കുട്ടിയെ എനിക്കു ഭാര്യയായി തരണം.
Verse 13: തങ്ങളുടെ സഹോദരി ദീനയെ ഷെക്കെം മാനഭംഗപ്പെടുത്തിയതുകൊണ്ട്‌ യാക്കോബിന്‍െറ മക്കള്‍ അവനോടും അവന്‍െറ പിതാവായ ഹാമോറിനോടും ചതിവായി സംസാരിച്ചു.
Verse 14: അവര്‍ പറഞ്ഞു: പരിച്‌ഛേദനം ചെയ്യാത്ത ഒരുവന്‌ ഞങ്ങളുടെ സഹോദരിയെ ഭാര്യയായി നല്‍കുക സാധ്യമല്ല. ഞങ്ങള്‍ക്ക്‌ അത്‌ അപമാനകരമാണ്‌.
Verse 15: എന്നാല്‍ ഒരു വ്യവസ്‌ഥയില്‍ ഞങ്ങളിതിനു സമ്മതിക്കാം. നിങ്ങളുടെ പുരുഷന്‍മാരെല്ലാം പരിച്‌ഛേദനം ചെയ്‌ത്‌ ഞങ്ങളെപ്പോലെയാകണം.
Verse 16: അങ്ങനെയെങ്കില്‍ ഞങ്ങളുടെ പുത്രിമാരെ നിങ്ങള്‍ക്കു തരാം. നിങ്ങളുടെ പുത്രിമാരെ ഞങ്ങളും സ്വീകരിക്കാം. ഞങ്ങള്‍ നിങ്ങളോടൊത്തു വസിക്കുകയും നമ്മള്‍ ഒരു ജനതയായിത്തീരുകയും ചെയ്യും.
Verse 17: ഞങ്ങള്‍ പറയുന്നതനുസരിച്ചു പരിച്‌ഛേദനം ചെയ്യാന്‍ നിങ്ങള്‍ ഒരുക്കമല്ലെങ്കില്‍ ഞങ്ങളുടെ മകളെയും കൊണ്ടു ഞങ്ങള്‍ സ്‌ഥലം വിടും.
Verse 18: അവരുടെ വ്യവസ്‌ഥ ഹാമോറിനും മകന്‍ ഷെക്കെമിനും ഇഷ്‌ടപ്പെട്ടു.
Verse 19: അങ്ങനെ ചെയ്യാന്‍ ആ ചെറുപ്പക്കാരന്‍ ഒട്ടും മടികാണിച്ചില്ല. കാരണം, യാക്കോബിന്‍െറ മകളില്‍ അവന്‍ അത്രമേല്‍ അനുരക്‌തനായിരുന്നു. അവന്‍െറ കുടുംബത്തില്‍ഏറ്റവും മതിക്കപ്പെട്ടവനായിരുന്നു ഷെക്കെം.
Verse 20: അതിനാല്‍, ഹാമോറും മകന്‍ ഷെക്കെമും നഗര കവാടത്തിങ്കല്‍ച്ചെന്ന്‌ അവരുടെ പട്ടണത്തിലെ പുരുഷന്‍മാരോട്‌ ഇപ്രകാരം പറഞ്ഞു:
Verse 21: ഈ മനുഷ്യര്‍ നമ്മോടു സൗഹാര്‍ദത്തിലാണ്‌. അവര്‍ ഈ നാട്ടില്‍ പാര്‍ത്ത്‌ ഇവിടെ തൊഴില്‍ ചെയ്യട്ടെ. ഈ നാട്‌ അവരെക്കൂടി ഉള്‍ക്കൊള്ളാന്‍മാത്രം വിശാലമാണല്ലോ. അവരുടെ പുത്രിമാരെ നമുക്കു ഭാര്യമാരായി സ്വീകരിക്കാം. നമ്മുടെ പുത്രിമാരെ അവര്‍ക്കു നല്‍കുകയും ചെയ്യാം.
Verse 22: എന്നാല്‍, ഒരു വ്യവസ്‌ഥയില്‍ മാത്രമേ ഇവര്‍ നമ്മോടൊത്തു പാര്‍ത്ത്‌ ഒരു ജനതയാകാന്‍ സമ്മതിക്കുകയുള്ളു. നമ്മുടെ പുരുഷന്‍മാരെല്ലാം അവരെപ്പോലെ പരിച്‌ഛേദനം ചെയ്യണം.
Verse 23: അവരുടെ സമ്പത്തും കന്നുകാലികളും മറ്റു മൃഗങ്ങളുമൊക്കെ നമ്മുടേതാവില്ലേ? നമുക്കിതു സമ്മതിക്കാം. എങ്കില്‍, അവര്‍ നമ്മുടെകൂടെ താമസിക്കും.
Verse 24: പട്ടണത്തിലെ പുരുഷന്‍മാരെല്ലാം ഹാമോറിന്‍െറയും മകന്‍ ഷെക്കെമിന്‍െറയും വാക്കുകള്‍ കേട്ടു പരിച്‌ഛേദനം ചെയ്‌തു.
Verse 25: മൂന്നാംദിവസം, അവര്‍ വേദനിച്ചിരുന്നപ്പോള്‍ ദീനയുടെ സഹോദരന്‍മാരും യാക്കോബിന്‍െറ പുത്രന്‍മാരുമായ ശിമയോനും ലേവിയും വാളെടുത്ത്‌ അപ്രതീക്‌ഷിതമായി നഗരത്തില്‍കടന്നു പുരുഷന്‍മാരെയെല്ലാം വധിച്ചു.
Verse 26: ഹാമോറിനെയും മകന്‍ ഷെക്കെമിനെയും അവര്‍ വാളിനിരയാക്കി; ഷെക്കെമിന്‍െറ വീട്ടില്‍ നിന്നു ദീനയെ വീണ്ടെടുത്ത്‌ അവര്‍ തിരിച്ചുപോയി.
Verse 27: തങ്ങളുടെ സഹോദരിയെ മാനഭംഗപ്പെടുത്തിയതിന്‍െറ പേരില്‍ യാക്കോബിന്‍െറ മക്കള്‍, മരിച്ചുകിടന്നവരുടെ ഇടയിലൂടെചെന്നു നഗരം കൊള്ളയടിച്ചു.
Verse 28: അവരുടെ ആടുമാടുകളെയും കഴുതകളെയും നഗരത്തിലും വയലിലുമുണ്ടായിരുന്ന സകലത്തെയും അവര്‍ അപഹരിച്ചു.
Verse 29: അവരുടെ സ്വത്തും വീട്ടുവകകളൊക്കെയും യാക്കോബിന്‍െറ മക്കള്‍ കൈവശപ്പെടുത്തി. കുഞ്ഞുങ്ങളെയും സ്‌ത്രീകളെയും പിടിച്ചുകൊണ്ടു പോവുകയും ചെയ്‌തു.
Verse 30: അപ്പോള്‍ യാക്കോബ്‌ ശിമയോനെയും ലേവിയെയും വിളിച്ച്‌ ഇങ്ങനെ പറഞ്ഞു: ഇന്നാട്ടുകാരായ കാനാന്‍കാരുടെയും പെരീസ്യരുടെയും മുന്‍പില്‍ നിങ്ങള്‍ എനിക്കു ദുഷ്‌കീര്‍ത്തി വരുത്തിയിരിക്കുന്നു. എനിക്ക്‌ ആള്‍ബലം കുറവാണ്‌. അവരൊന്നിച്ചു കൂടി എന്നെ ആക്രമിച്ചാല്‍ ഞാന്‍ തകര്‍ന്നുപോകും. ഞാനും കുടുംബവും നശിക്കും.
Verse 31: അവര്‍ ചോദിച്ചു: ഒരുവേശ്യയോടെന്നപോലെ അവന്‍ ഞങ്ങളുടെ സഹോദരിയോടു പെരുമാറിയതെന്തിന്‌?