Verse 1: പിതാവിനു സുഖമില്ലെന്നു കേട്ട്‌ ജോസഫ്‌ മക്കളായ മനാസ്‌സെയെയും എഫ്രായിമിനെയും കൂട്ടിക്കൊണ്ട്‌ അവന്‍െറ അടുത്തേയ്‌ക്കുപോയി.
Verse 2: മകനായ ജോസഫ്‌ വരുന്നുണ്ട്‌ എന്നു യാക്കോബു കേട്ടു. അവന്‍ ശക്‌തി സംഭരിച്ചു കിടക്കയില്‍ എഴുന്നേറ്റിരുന്നു.
Verse 3: യാക്കോബ്‌ ജോസഫിനോടു പറഞ്ഞു: സര്‍വശക്‌തനായ ദൈവം കാനാന്‍ദേശത്തുള്ള ലൂസില്‍വച്ച്‌ എനിക്കു പ്രത്യക്‌ഷപ്പെട്ട്‌ എന്നെ അനുഗ്രഹിച്ചു. അവിടുന്ന്‌ അരുളിച്ചെയ്‌തു:
Verse 4: ഞാന്‍ നിന്നെ സന്താന സമൃദ്‌ധിയുള്ളവനാക്കി നിന്‍െറ സംഖ്യ വര്‍ധിപ്പിക്കും. നിന്നില്‍നിന്നു ഞാന്‍ ജനതതികളെ പുറപ്പെടുവിക്കും. നിനക്കുശേഷം ഈ നാടു നിന്‍െറ സന്തതികള്‍ക്കു ഞാന്‍ നിത്യാവകാശമായി നല്‍കും.
Verse 5: ഞാന്‍ ഈജിപ്‌തില്‍ നിന്‍െറ അടുത്ത്‌ എത്തുന്നതിനുമുന്‍പ്‌ ഈജിപ്‌തില്‍വച്ചു നിനക്കുണ്ടായ പുത്രന്‍മാരിരുവരും, എഫ്രായിമും മനാസ്‌സെയും എന്‍േറതാണ്‌. റൂബനും ശിമയോനും എന്നപോലെ അവരെന്‍േറ തായിരിക്കും.
Verse 6: അവര്‍ക്കുശേഷം നിനക്കുണ്ടാകുന്ന സന്തതികള്‍ നിന്‍േറ തായിരിക്കും. അവര്‍ക്കു ലഭിക്കുന്ന അവകാശം അവരുടെ സഹോദരങ്ങളുടെ പേരിലായിരിക്കും അറിയപ്പെടുക.
Verse 7: ഞാന്‍ പാദാനില്‍നിന്നു പോയപ്പോള്‍, വഴിക്കു കാനാന്‍ ദേശത്തുവച്ച്‌ എന്നെ ദുഃഖത്തിലാഴ്‌ത്തിക്കൊണ്ടു റാഹേല്‍ മരിച്ചു. എഫ്രാത്തായിലെത്താന്‍ കുറച്ചുദൂരം മാത്രമേ ഉണ്ടായിരുന്നുള്ളു. ബേത്‌ലെഹെം എന്നറിയപ്പെടുന്ന എഫ്രാത്തായിലേക്കുള്ള വഴിയില്‍ ഞാന്‍ അവളെ അടക്കി.
Verse 8: ജോസഫിന്‍െറ പുത്രന്‍മാരെക്കണ്ടപ്പോള്‍ ഇസ്രായേല്‍, ഇവരാരാണ്‌? എന്നുചോദിച്ചു.
Verse 9: ജോസഫ്‌ പറഞ്ഞു: ഇവര്‍ എന്‍െറ മക്കളാണ്‌, ഇവിടെവച്ചു ദൈവം എനിക്കു തന്നവര്‍. അവന്‍ പറഞ്ഞു: അവരെ എന്‍െറ അടുക്കല്‍ കൊണ്ടുവരുക, ഞാന്‍ അവരെ അനുഗ്രഹിക്കട്ടെ.
Verse 10: ഇസ്രായേലിനു പ്രായം കൊണ്ടു കണ്ണുകള്‍ മങ്ങി, കാഴ്‌ച നഷ്‌ടപ്പെട്ടിരുന്നു. ജോസഫ്‌ അവരെ അവന്‍െറ അടുത്തു കൊണ്ടുചെന്നു. അവന്‍ അവരെ കെട്ടിപ്പിടിച്ചു ചുംബിച്ചു.
Verse 11: ഇസ്രായേല്‍ ജോസഫിനോടു പറഞ്ഞു: നിന്‍െറ മുഖം കാണുമെന്നു ഞാന്‍ വിചാരിച്ചിരുന്നില്ല. എന്നാല്‍ ഇതാ, നിന്‍െറ മക്കളെക്കൂടി കാണാന്‍ ദൈവം എന്നെ അനുവദിച്ചിരിക്കുന്നു!
Verse 12: അപ്പോള്‍ ജോസഫ്‌ കുട്ടികളെ അവന്‍െറ അടുത്തുനിന്നു മാറ്റിയിട്ടു നിലംപറ്റെ കുനിഞ്ഞു നമസ്‌കരിച്ചു.
Verse 13: ജോസഫ്‌ എഫ്രായിമിനെ തന്‍െറ വലത്തു കൈകൊണ്ടു പിടിച്ച്‌ ഇസ്രായേലിന്‍െറ ഇടത്തു കൈക്കു നേരെയും, മനാസ്‌സെയെ ഇടത്തു കൈകൊണ്ടു പിടിച്ച്‌ ഇസ്രായേലിന്‍െറ വലത്തുകൈക്കു നേരെയും നിര്‍ത്തി അവന്‍െറ യടുത്തേക്കു കൊണ്ടുചെന്നു.
Verse 14: എന്നാല്‍, ഇസ്രായേല്‍ കൈകള്‍പിണച്ച്‌ വലംകൈ ഇളയവനായ എഫ്രായിമിന്‍െറ തലയിലും ഇടംകൈ മനാസ്‌സെയുടെ തലയിലും ആണു വച്ചത്‌. മനാസ്‌സെയായിരുന്നുവല്ലോ കടിഞ്ഞൂല്‍പുത്രന്‍.
Verse 15: അവന്‍ ജോസഫിനെ അനുഗ്രഹിച്ചുകൊണ്ടു പറഞ്ഞു: എന്‍െറ പിതാക്കന്‍മാരായ അബ്രാഹവും ഇസഹാക്കും ആരാധിച്ചിരുന്നദൈവം, ഇന്നുവരെ എന്‍െറ ജീവിതകാലം മുഴുവന്‍ എന്‍െറ ഇടയനായിരുന്ന ദൈവം,
Verse 16: എല്ലാ തിന്‍മകളിലുംനിന്ന്‌ എന്നെ കാത്തുപോന്ന ദൂതന്‍ ഈ ബാലന്‍മാരെ അനുഗ്രഹിക്കട്ടെ! എന്‍െറയും എന്‍െറ പിതാക്കന്‍മാരായ അബ്രാഹത്തിന്‍െറയും ഇസഹാക്കിന്‍െറയും നാമം അവരില്‍ നിലനില്‍ക്കട്ടെ. അവര്‍ ഭൂമിയുടെ മധ്യത്തില്‍ ശക്‌തമായ ഒരു സമൂഹമായി വളര്‍ന്നുവരട്ടെ!
Verse 17: തന്‍െറ പിതാവു വലംകൈ എഫ്രായിമിന്‍െറ തലയില്‍ വച്ചതു ജോസഫിന്‌ ഇഷ്‌ടപ്പെട്ടില്ല. എഫ്രായിമിന്‍െറ തലയില്‍നിന്നുമനാസ്‌സെയുടെ തലയിലേക്കു മാറ്റാന്‍ അവന്‍ പിതാവിന്‍െറ കൈയ്‌ക്കു പിടിച്ചു.
Verse 18: ജോസഫ്‌ പിതാവിനോടു പറഞ്ഞു: പിതാവേ, അങ്ങനെയല്ല, ഇവനാണു മൂത്ത മകന്‍ . വലംകൈ ഇവന്‍െറ തലയില്‍ വയ്‌ക്കുക. അവന്‍ വഴങ്ങിയില്ല.
Verse 19: അവന്‍ പറഞ്ഞു: എനിക്കറിയാം, മകനേ, എനിക്കറിയാം. അവനില്‍ നിന്നും ഒരു ജനതയുണ്ടാകും; അവനും വലിയവനാകും. എന്നാല്‍ അവന്‍െറ അനുജന്‍ അവനെക്കാള്‍ വലിയവനാകും; അവന്‍െറ സന്തതികളോ അനവധി ജനതകളും.
Verse 20: അവരെ അനുഗ്രഹിച്ചുകൊണ്ട്‌ അവന്‍ പറഞ്ഞു: നിങ്ങളുടെ നാമം ഉച്ചരിച്ച്‌, ദൈവം നിങ്ങളെ എഫ്രായിമിനെയും മനാസ്‌സെയുംപോലെ ആക്കട്ടെ, എന്നു പറഞ്ഞു കൊണ്ടായിരിക്കും ഇസ്രായേലില്‍ അനുഗ്ര ഹങ്ങള്‍ ആശംസിക്കപ്പെടുക. അവന്‍ എഫ്രായിമിനെ മനാസ്‌സെക്കു മുന്‍പനാക്കി.
Verse 21: അതു കഴിഞ്ഞ്‌, ഇസ്രായേല്‍ ജോസഫിനോടു പറഞ്ഞു: ഞാന്‍ ഇതാ, മരിക്കാറായി. ദൈവം നിന്‍െറ കൂടെയുണ്ടാവും. നിന്‍െറ പിതാക്കന്‍മാരുടെ നാട്ടിലേക്കു നിന്നെതിരിയേ കൊണ്ടുപോവുകയും ചെയ്യും.
Verse 22: നിന്‍െറ സഹോദരന്‍മാര്‍ക്കു നല്‍കിയ ഓഹരിയെക്കാള്‍ കൂടുതലായി വാളും വില്ലും കൊണ്ട്‌ അമോര്യരുടെ കൈയില്‍നിന്നു ഞാന്‍ പിടിച്ചടക്കിയ ഷെക്കെം നിനക്കു തന്നിരിക്കുന്നു.