Verse 1: അബിയാ പിതാക്കന്‍മാരോടു ചേര്‍ന്നു; ദാവീദിന്‍െറ നഗരത്തില്‍ സംസ്‌കരിക്കപ്പെട്ടു. മകന്‍ ആസാ രാജാവായി. ആസായുടെ കാലത്ത്‌ പത്തുവര്‍ഷം ദേശത്ത്‌ സമാധാനം നിലനിന്നു.
Verse 2: ആസാ ദൈവമായ കര്‍ത്താവിന്‍െറ ദൃഷ്‌ടിയില്‍ നീതിയും നന്‍മയും പ്രവര്‍ത്തിച്ചു.
Verse 3: അവന്‍ അന്യദേവന്‍മാരുടെ ബലിപീഠങ്ങളും പൂജാഗിരികളും നീക്കം ചെയ്‌തു. സ്‌തംഭങ്ങള്‍ ഇടിച്ചുതകര്‍ത്തു. അഷേരാപ്രതിഷ്‌ഠകള്‍ വെട്ടിവീഴ്‌ത്തി.
Verse 4: യൂദാനിവാസികളോട്‌ തങ്ങളുടെ പിതാക്കന്‍മാരുടെ ദൈവമായ കര്‍ത്താവിനെ അന്വേഷിക്കുവാനും അവിടുത്തെനിയമങ്ങളും പ്രമാണങ്ങളും അനുസരിക്കുവാനും കല്‍പിച്ചു.
Verse 5: കൂടാതെ യൂദാനഗരങ്ങളില്‍നിന്നു പൂജാഗിരികളും ബലിപീഠങ്ങളും നീക്കം ചെയ്‌തു. അവന്‍െറ കാലത്ത്‌ രാജ്യത്തു സമാധാനം നിലനിന്നു.
Verse 6: രാജ്യത്തു സമാധാനമുണ്ടായിരുന്നതിനാല്‍ , യൂദായിലെ പല നഗരങ്ങളും അവന്‍ ബല വത്താക്കി. കര്‍ത്താവു സ്വസ്‌ഥത നല്‍കിയതിനാല്‍, ആ കാലത്ത്‌യുദ്‌ധം വേണ്ടിവന്നില്ല.
Verse 7: അവന്‍ യൂദാനിവാസികളോടു പറഞ്ഞു: നമുക്ക്‌ ഈ പട്ടണങ്ങള്‍ പുതുക്കിപ്പണിയാം; അവയെ മതിലുകളും ഗോപുരങ്ങളും വാതിലുകളും ഓടാമ്പലുകളും കൊണ്ട്‌ സുരക്‌ഷിതമാക്കാം. നാം നമ്മുടെ ദൈവമായ കര്‍ത്താവിനെ അന്വേഷിക്കുന്നതിനാല്‍ ദേശം ഇപ്പോഴും നമ്മുടെ അധീനതയില്‍ത്തന്നെ. നാം വിളിച്ചപേക്‌ഷിച്ചു; അതിര്‍ത്തികളിലെല്ലാം അവിടുന്ന്‌ സമാധാനം നല്‍കിയിരിക്കുന്നു. അങ്ങനെ അവര്‍ എല്ലാം പണിത്‌ ഭദ്രമാക്കി.
Verse 8: ആസായ്‌ക്ക്‌ യൂദായില്‍നിന്ന്‌ കുന്തവും പരിചയും ധരി ച്ചമൂന്നുലക്‌ഷം പടയാളികളും ബഞ്ചമിനില്‍നിന്നു ചെറുപരിചയും വില്ലും ധരി ച്ചരണ്ടു ലക്‌ഷത്തിയെണ്‍പതിനായിരം പേരും ഉണ്ടായിരുന്നു. ഇവരെല്ലാം ധീരയോദ്‌ധാക്കളായിരുന്നു.
Verse 9: എത്യോപ്യനായ സേരാ, പത്തുലക്‌ഷം പടയാളികളും മുന്നൂറു രഥങ്ങളുമായി അവര്‍ക്കെതിരേ മരേഷാവരെ എത്തി.
Verse 10: ആസാ അവനെതിരേ പുറപ്പെട്ടു. ഇരുകൂട്ടരും മരേഷായിലെ സെഫാതാ താഴ്‌വരയില്‍ അണിനിരന്നു.
Verse 11: അപ്പോള്‍ ആസാ തന്‍െറ ദൈവമായ കര്‍ത്താവിനോടു നിലവിളിച്ചു: കര്‍ത്താവേ, ബലവാനെതിരേ ബലഹീനനെ സഹായിക്കാന്‍ അവിടുന്നല്ലാതെ മറ്റാരുമില്ല. ഞങ്ങളുടെ ദൈവമായ കര്‍ത്താവേ, ഞങ്ങള്‍ അങ്ങയെ ശരണം പ്രാപിക്കുന്നു; ഞങ്ങളെ സഹായിക്കണമേ! അവിടുത്തെനാമത്തിലാണ്‌ ഞങ്ങള്‍ ഈ വലിയ സൈന്യത്തിനെതിരേ വന്നിരിക്കുന്നത്‌. കര്‍ത്താവേ, അവിടുന്നാണു ഞങ്ങളുടെ ദൈവം; അങ്ങേക്കെതിരേ മര്‍ത്യന്‍ പ്രബലനാകരുതേ!
Verse 12: ആസായുടെയും യൂദായുടെയും മുന്‍പില്‍ കര്‍ത്താവ്‌ എത്യോപ്യരെ പരാജയപ്പെടുത്തി. അവര്‍ തോറ്റോടി.
Verse 13: ആസായും കൂട്ടരും ഗരാര്‍വരെ അവരെ പിന്‍തുടര്‍ന്നു. ഒന്നൊഴിയാതെ എത്യോപ്യരെല്ലാവരും മരിച്ചുവീണു. അവര്‍ കര്‍ത്താവിന്‍െറയും അവിടുത്തെ സൈന്യത്തിന്‍െറയും മുന്‍പില്‍ തകര്‍ന്നുപോയിരുന്നു. അന്ന്‌ യൂദാസൈന്യം വലിയൊരു കൊള്ള നടത്തി.
Verse 14: ഗരാറിനു ചുറ്റുമുള്ള സകലപട്ടണങ്ങളും അവര്‍ തകര്‍ത്തു. അവിടത്തെനിവാസികള്‍ കര്‍ത്താവിനെക്കുറിച്ചുള്ള ഭയം നിമിത്തം പരിഭ്രാന്തരായിരുന്നു. യൂദാസൈന്യം അവ കൊള്ളയടിച്ചു ധാരാളം വസ്‌തുക്കള്‍ കരസ്‌ഥമാക്കി.
Verse 15: മൃഗശാലകള്‍ നശിപ്പിച്ചു ധാരാളം ആടുകളെയും ഒട്ടകങ്ങളെയും കൈവശപ്പെടുത്തി; അവര്‍ ജറുസലെമിലേക്കു മടങ്ങി.